قازاقستاندا شەتەلدىك انشىلەردىڭ گاسترولدىك ساپارلارىن ۇيىمداستىرۋ ءتارتىبى وزگەرەدى: ەندى كونسەرت وتكىزۋ الدىمەن كەلىسىمشارت جاساۋدان باستالىپ، مەملەكەتتىك ورگاندار ورىندالاتىن اندەردىڭ مازمۇنىنا دا نازار اۋدارادى، دەپ حابارلايدى Aqshamnews.kz ءتىلشىسى.
مادەنيەت جانە اقپارات ۆيسە-مينيسترى ەۆگەنيي كوچەتوۆتىڭ ايتۋىنشا، بۇعان دەيىن كەيبىر ۇيىمداستىرۋشىلار شەتەلدىك ءارتىس بەلگىلى ءبىر قالاعا كەلەتىنىن حابارلاپ، الاڭدى الدىن الا كەلىسىمشارتسىز-اق تاۋىپ، بيلەت ساتۋدى باستاپ كەتەتىن. ال كەلىسىمشارت كەيىنىرەك بەكىتىلىپ، اكىمدىك جانە جەرگىلىكتى اتقارۋشى ورگاندارمەن جۇمىس تەك سودان سوڭ جۇرگىزىلگەن. سونىڭ سالدارىنان اكىمدىكتەر مەن مينيسترلىك كونسەرت تۋرالى كەيدە الەۋمەتتىك جەلىدەن عانا ءبىلىپ وتىرعان.
كوچەتوۆ مۇنداي تاجىريبە حالىقارالىق ستاندارتقا ساي ەمەس ەكەنىن ايتىپ، جاڭا مەحانيزم ەنگىزىلەتىنىن مالىمدەدى. ەندى گاسترولدىك تۋر اياسىندا قالادا كونسەرت جوسپارلانعان ساتتەن باستاپ، ەڭ الدىمەن، كەلىسىمشارت جاسالىپ، اكىمدىكپەن كەلىسۋ جۇمىسى باستالماق. ۆيسە-مينيستردىڭ سوزىنشە، كەلىسىمشارتتا شەتەلدىك ارتىسكە قويىلاتىن مىندەتتى تالاپتار كورسەتىلەدى. نەگىزگى تالاپتاردىڭ ءبىرى – ورىندالاتىن ءان ماتىندەرىنىڭ مازمۇنى: ولار ەلدىڭ ۇلتتىق قۇرىلىمىنا نۇقسان كەلتىرمەۋى، پورنوگرافيانى نەمەسە ەسىرتكىنى ناسيحاتتاماۋى ءتيىس.
ەگەر ءان ماتىندەرىنەن زاڭعا قايشى كونتەنت انىقتالماسا، ءارتىس قازاقستاندا ونەر كورسەتۋگە قۇقىلى. ال تىيىم سالىنعان تاقىرىپتار كەزدەسسە، مەملەكەتتىك ورگاندار ولاردى ورىنداماۋ جونىندە ۇسىنىس بەرەدى، قاجەت بولعان جاعدايدا كونسەرتتى وتكىزۋگە تىيىم سالۋ نەمەسە ۋاقىتشا توقتاتۋ ماسەلەسى قاراستىرىلادى.
ايتا كەتەيىك، سەنات كرەاتيۆتى يندۋستريالاردى قولداۋ جانە دامىتۋعا قاتىستى زاڭدى ماقۇلدادى. سوعان سايكەس، شەتەلدىك ارتىستەر قاتىساتىن كونسەرتتەر مەن مادەني ءىس-شارالار كەمىندە 30 جۇمىس كۇنى بۇرىن الدىن الا كەلىسۋدەن ءوتۋى كەرەك. كەلىسۋ ءتارتىبىن ارنايى ۋاكىلەتتى ورگان بەلگىلەيدى.