الماتىدا مەملەكەت پايداسىنا تاركىلەنۋگە ءتيىس مۇلىككە قاتىستى تىيىمدى اقپاراتتىق جۇيە ارقىلى زاڭسىز الىپ تاستاپ، جىلجىمايتىن مۇلىكتى بوتەن ادامداردىڭ اتىنا قايتا راسىمدەۋدى ۇيىمداستىرعاندار سوتتالدى، دەپ حابارلايدى Aqshamnews.kz ءتىلشىسى.
قارجىلىق مونيتورينگ اگەنتتىگىنىڭ مالىمەتىنشە، ءىس كوسپايەۆتىڭ باسشىلىعىمەن ارەكەت ەتكەن ۇيىمداسقان قىلمىستىق توپقا قاتىستى تەرگەۋ اياسىندا قارالعان. بۇعان دەيىن بۇل توپتىڭ «AV-Construction» ج ش س، «ستەكولنىي زاۆود» ج ش س، «شالقار 17» ج ش س، «باحار-ا» ج ش س جانە وزگە دە كاسىپورىنداردى رەيدەرلىك جولمەن باسىپ الۋ فاكتىلەرى بويىنشا اشكەرەلەنگەنى حابارلانعان.
سوت شەشىمىمەن تاركىلەۋ ماقساتىندا الماتىداعى «نيكولسكيي» بازارى اۋماعىندا ورنالاسقان «Nikolsky Investment» جشس-گە تيەسىلى جەر تەلىمى مەن مۇلكىنە تىيىم سالىنعان. الايدا 2025 جىلدىڭ قىركۇيەگىندە اسلان پۋحايەۆ، انتون ءسولوۆوۆ جانە جاقسىلىق سارسەنبايەۆ «ازاماتتارعا ارنالعان ۇكىمەت» مەملەكەتتىك كورپوراسياسىنىڭ اقپاراتتىق جۇيەسىنە جالعان مالىمەت ەنگىزۋ ارقىلى بۇل تىيىمدى زاڭسىز الىپ تاستاۋدى ۇيىمداستىرعان.
كەيىن جالپى قۇنى 2،2 ملرد تەڭگەگە باعالانعان مۇلىك پەن جەر تەلىمى ءارى قاراي ساتۋ ءۇشىن جالعان تۇلعالاردىڭ اتىنا قايتا راسىمدەلگەن.
سوت ۇكىمىمەن ايىپتىلار 6 جىل 6 اي مەرزىمگە باس بوستاندىعىنان ايىرىلدى. ۇكىم زاڭدى كۇشىنە ەنگەن. مۇلىك مەملەكەت مەنشىگىنە قايتارىلدى.
قما مەملەكەتتىك اقپاراتتىق جۇيەلەرگە زاڭسىز ارالاسۋ جانە سوعان بايلانىستى قۇقىققا قايشى ارەكەتتەر ءۇشىن جازانىڭ بۇلتارتپاستىعىن ەسكەرتتى.