Almatydaǵy №7 qalalyq klınıkalyq aýrýhananyń neırohırýrgtary mı tamyrlaryna kúrdeli neırohırýrgıalyq otany sátti jasap shyqty. 65 jastaǵy áıelge ıshemıalyq ınsýlt kezinde jańa operasıalyq júıeni paıdalaný arqyly «zergerlik» operasıa jasaldy.
«Pasıent oń jaq orta mı arterıasy baseıninde ıshemıalyq ınsýlttiń klınıkalyq-nevrologıalyq sımptomatıkasymen kelip tústi: sol jaq gemıparez, sol jaq bet bulshyq etiniń ortalyq parezi, sóıleýdiń buzylýy – dızartrıa. Shuǵyl túrde ota jasaldy – selektıvti serebraldy angıografıa, onda oń jaq ishki uıqy arterıasynyń oftálmıalyq segment deńgeıindegi jiti oklúzıa (tromboz/tromboembolıa) kórinisi anyqtaldy», – deıdi №7 Almaty qalalyq klınıkalyq aýrýhanasynyń tamyrlyq neırohırýrgıa bólimshesiniń meńgerýshisi Raýan Kasteı.
Qannyń uıýy aýyr zardaptarǵa jáne tipti ólimge ákelýi múmkin. Ári qaraı, buryn klınıkalyq praktıkada keńinen qoldanylǵan ACE62 ornyna, jańadan engizilgen RED72 aspırasıalyq kateterin qoldana otyryp, oń jaq ishki uıqy arterıasynan qan uıyǵyshynyń rentgenendovaskýlárlyq mehanıkalyq trombaspırasıasy júrgizildi.
Neırohırýrgtar jańa kateterdiń artyqshylyqtaryn jaqsy baǵalaýda: trombty alýdyń neǵurlym joǵary kúshin qamtamasyz etetin ishki sańylaýdyń keńeıtilýi, tegis baqylaý múmkindigi jáne neǵurlym alys ótý úshin jaqsartylǵan gıdrofıldi jabyn, nátıjesi – otanyń sátti jasalýyna úlken múmkindik beredi.
Engizilgen bul zamanaýı ınovasıa pasıentterge joǵary tehnologıalyq medısınalyq kómek kórsetý sapasyn taǵy bir satyǵa kóterdi. Aıta ketsek, bul bólimshede jyl saıyn mıdyń ártúrli kúrdeli patologıalary bar 600-den astam naýqasqa ota jasalady.