Almaty garnızonynda sarbazdarǵa arnalǵan jańa asqana men medısınalyq pýnkt ashyldy. Bul týraly QR Ulttyq ulany «Ońtústik» óńirlik qolbasshylyǵynyń baspasóz qyzmeti habarlady.
QR İshki ister mınıstriniń orynbasary – Ulttyq ulannyń Bas qolbasshysy general-leıtenant Erkin Botaqanov «Ońtústik» óńirlik qolbasshylyǵyna barǵan issaparynda 3660 áskerı bóliminde jańadan ashylǵan modýldik úlgidegi asqana men medısınalyq pýnktti iske qosty.
Jańa asqanada bir mezette 160 sarbaz tamaqtana alady. Asqana azyq-túlik rasıony normalaryna sáıkes túrli taǵamdardy daıyndaýǵa múmkindik beretin zamanaýı tehnologıalyq jabdyqtarymen jaraqtalǵan. Nysan qurylys jáne sanıtarlyq norma talaptaryna tolyq jaýap beredi. Onda avtonomdy jylytý, jeldetý júıeleri ornatylǵan.
Sonymen qatar jańadan ashylǵan medısınalyq-sanıtarlyq kómek bólimi 900-ge jýyq áskerı qyzmetshige medısınalyq qyzmet kórsetedi. Emdeý ornynda naýqastarǵa alǵashqy medısınalyq kómek kórsetýge tolyq jaǵdaı jasalǵan. Jańa nysan emdeý, egý, emdelýshilerdi qabyldaý, dári-dármekti saqtaý kabınetterimen jáne stasıonarlyq bólmelermen qamtylǵan. Budan basqa munda alǵashqy medısınalyq kómek túrleri, profılaktıkalyq tekserýler jáne taǵy basqa emdeý-aldyn alý is-sharalary júrgiziledi.
– Jańa asqanany iske qosý tamaqtanýdyń uıymdastyrylýy men astyń sapasyn jaqsartady. Al qajetti qondyrǵylarmen jabdyqtalǵan medısınalyq pýnkt áskerı qyzmetshiler úshin kórsetiletin medısınalyq kómektiń sapasyn arttyrýǵa múmkindik beredi. Ulttyq ulan basshylyǵy merzimdi áskerı qyzmettegi jaýyngerlerdiń áleýmettik-turmystyq jaǵdaıyn jaıly etýge, sondaı-aq olardy sapaly oqytyp, daıarlaý úshin bar múmkindikti jasap keledi, – dedi general-leıtenant Erkin Botaqanov.