Qazaqstandaǵy zergerlik buıymdardyń kóleńkeli naryǵy 99 paıyzǵa jetedi.
Qazaqstan zergerleri lıgasynyń málimetinshe, elimizde kontrafaktilik sehtar jumys isteýde, onda arnaıy jabdyqtardyń kómegimen taýar Túrkıa, Italıa nemese Reseıde jasalynǵanyn málimdeıtin jalǵan shtamptar bar. Adal kásiporyndar kóleńkeli naryqpen básekege túse almaı, óndiristi toqtatýǵa májbúr, dep habarlaıdy almaty-akshamy.kz.
2024 jyldyń 1 shildesien bastap Qazaqstan Respýblıkasyna ákelinetin nemese Qazaqstan Respýblıkasynyń aýmaǵynda óndirilgen baǵaly metaldar men asyl tastardan jasalǵan zergerlik buıymdardy bólshek jáne kóterme saýdaǵa ótkizý kezinde tańbalanǵan ónimdi aınalymnan mindetti túrde alyp tastaı otyryp, mindetti tańbalaý qajet.
Taýarlardy sıfrlyq tańbalaý jáne qadaǵalaý júıesiniń negizgi maqsaty Qazaqstandaǵy taýar aınalymyn ashyq etý ekenin esterińizge salamyz.
Qazaqstan Respýblıkasynyń aýmaǵynda baǵaly metaldar men asyl tastardan jasalǵan zergerlik buıymdardy mindetti túrde tańbalaýdy engizý dárilik zattardy tańbalaý kezindegideı kezeń-kezeńmen emes, bir rettik bolady.
«Zergerlik buıymdar naryǵy kontrabanda men kontrafaktilik taýarlarǵa toly kezde sıfrlyq tańbalaý bıznesimizdegi ashyqtyq pen ádildikti qamtamasyz etýdiń mańyzdy quralyna aınalady. Sıfrlyq tańbalaý taýardyń búkil jetkizý tizbegi boıynsha ónimniń qadaǵalanýyn jaqsartyp qana qoımaı, tutynýshylarǵa olar satyp alatyn ónimderdiń túpnusqalyǵyna senimdilik beredi, sonymen qatar tutynýshylardyń alaıaqtyǵyna jol bermeý arqyly bizdiń salanyń turaqtylyǵyn qamtamasyz etýge yqpal etedi. Bul tutastaı alǵanda bizdiń salaǵa tutynýshylardyń senimin arttyrýǵa kómektesedi. Memleketpen birlesken kúsh-jigerdiń arqasynda ǵana biz naryqtyń tazalyǵy men ashyqtyǵyn qamtamasyz ete alamyz, bıznesti damytýǵa jáne tutynýshylar senimine qolaıly jaǵdaı jasaı alamyz. Bul jaýapkershilikti, tipti josyqsyz kásipkerlerge qatysty qylmystyq jaýapkershilikti bir mezgilde kúsheıtkende ǵana múmkin. Bul eki shart tutynýshylardy aldaýdan saqtaıdy», - deıdi Qazaqstan zergerler lıgasynyń tóraǵasy Qaısar Jumaǵalıev.
Indýstrıa jáne qurylys mınıstrligi ókilderiniń aıtýynsha, búginde tańbalanbaǵan zergerlik buıymdardyń qaldyqtaryn satýǵa ruqsat etilgen jáne olardy satýǵa ázirge aıyppul salynbaǵan. Degenmen saýda jáne ıntegrasıa mınıstrliginiń tehnıkalyq retteý jáne metrologıa komıteti Ákimshilik quqyq buzýshylyq týraly kodekske ózgerister engizýdi josparlap otyrǵanyn esterińizge sala keteıik. Túzetýler shaǵyn, orta jáne iri bızneske qatysty bolady.
Osy jyly Taýarlardy tańbalaý jáne qadaǵalaý jónindegi biryńǵaı operatordyń ókilderi Astana, Almaty jáne Shymkent qalalarynda zergerlik buıymdardy tańbalaý boıynsha oqytý semınarlaryn ótkizedi. Semınarlar kestesin taýarlardy tańbalaýdyń https://markirovka.ismet.kz resmı saıtynda kórýge bolady.
Eske salaıyq, Qazaqstanda mindetti sıfrlyq tańbalaý jáne qadaǵalaý úsh ónim tobyna qoldanylady: 2020 jyldan bastap temeki ónimderine, 2021 jyldyń qarashasynan aıaq kıim ónimderine jáne 2022 jyldyń qarashasynan bastap 90 dárilik zatqa, al 2024 jyldyń 1 shildesinen bastap dárilik zattardyń 100% qoldanylady.
Sıfrlyq tańbalaý júıesi jáne taýarlardy qadaǵalaý týraly tolyq aqparat alý úshin 8 800 080 6565 telefony boıynsha táýlik boıy jumys isteıtin baılanys ortalyǵy jumys isteıdi.