Qańtar aıynan bastap álemniń ár túkpirindegi Qazaqstan elshilikteri elimizge keletin shetel azamattarynan saýsaq izin alýdy bastady.
Vashıngtondaǵy Konsýldyq qyzmette Qazaqstanǵa barýdy josparlaǵan sheteldikterdi daktıloskopıalyq tirkeýden ótkizip jatyr. Vızaǵa ótinish bergen ózge el azamaty on saýsaǵynyń izin tapsyrady, dep habarlaıdy Almaty-akshamy.kz 24.kz-ge silteme jasap.
Mundaı talap elimizde turaqty turý úshin ruqsat alýǵa nıet bildirgen azamattyǵy joq adamdarǵa da qoıylady. Jalpy AQSH azamattary Qazaqstanǵa 30 kúnge deıin vızasyz kire alady. Biraq jumys, oqý, bıznes maqsatymen uzaq merzimge baratyndar úshin vıza mindetti. AQSH-taǵy Qazaqstan elshiliginde elimizge oqýǵa attanǵaly jatqan amerıkalyq stýdentter alǵash ret saýsaq izin tapsyryp jatyr. Zań boıynsha 16 jastan asqan árbir sheteldik osy rásimnen ótýi tıis. Daktıloskopıa álemdik tájirıbede keńinen qoldanylady. Ol memlekettik organdarǵa jeke tulǵalardy tez anyqtaý jáne kóshi-qon aǵynyn baqylap, qylmystyń izin sýytpaı ashý úshin qajet. Iaǵnı, ulttyq qaýipsizdik úshin asa mańyzdy. Zań talaby boıynsha sheteldikterdiń jeke bas málimetteri 10 jyl boıy aqparattyq bazada, odan keıin 40 jyl muraǵatta saqtalady.
«Qazaqstan endi ǵana tizimge qosyldy. Bul proses elektrondy júıemen baılanysty bolǵandyqtan, keıde kishigirim aqaýlar bolyp turady, ony túsinemiz. Biraq másele ýaqytyly sheshilip jatyr. Biz bul jerde aıtarlyqtaı úlken problema kórmedik», - deıdi «American Councils» halyqaralyq bilim menedjeri Iraklı Sarazıdze.