Prezıdent óńirdegi ahýaldyń baqylaýda ekenin aıtty.
Prezıdent Qostanaı oblysynda bolǵan órtti sóndirý jónindegi shuǵyl áreket etý shtabynyń otyrysyn ótkizdi, dep habarlaıdy Almaty-akshamy.kzt BORT№1 Telegram-arnasyna silteme jasap.
Memleket basshysy Tótenshe jaǵdaılar mınıstri Iýrıı Ilın men Qostanaı oblysynyń ákimi Arhımed Muhambetovtiń órtti aýyzdyqtaý, eldi mekenderdegi azamattardy evakýasıalaý jáne zardap shekken turǵyndarǵa qoldaý kórsetý jóninde qabyldanǵan sharalar týraly baıandamalaryn tyńdady.
Prezıdent óńirdegi ahýaldyń baqylaýda ekenin aıtty. Tabıǵı apatty joıý úshin barlyq qajetti sharalar qabyldanǵan.
Qasym-Jomart Toqaev bolǵan jaǵdaıdan tıisti sabaq alý qajet ekenin atap ótip, órtti tolyq ári jyldam aýyzdyqtaý úshin shuǵyl áreket etý shtabyna barlyq vedomstvonyń úzdiksiz jumysyn qamtamasyz etýge baǵyttalǵan birqatar naqty tapsyrma berdi.
Prezıdent úılerin tastap ketýge májbúr bolǵan adamdarǵa tolyqqandy qoldaý kórsetýdiń mańyzdy ekenin atap ótti. Úkimet pen Qostanaı oblysynyń ákimdigine zardap shekken turǵyndarǵa shuǵyl túrde ótemaqy tóleý máselesin qamtamasyz etý tapsyryldy.
«Zardap shekken azamattardyń bárine qajetti kómek beriledi. Olar qaýipsiz jerge kóshirildi. Meniń tapsyrmam boıynsha Úkimet tıisti máselelerdi sheshý jumystarymen aınalysyp jatyr. Kómek kórsetiletinine eshqandaı kúmán bolmaýǵa tıis», – dedi Memleket basshysy.
Qasym-Jomart Toqaev órttiń shyǵý sebebin anyqtaý qajet ekenine nazar aýdardy. Onyń aıtýynsha, orman alqabyn qaıta qalpyna keltirý úshin keshendi sharalar ázirlep, aldaǵy ýaqytta osyndaı apatty jaǵdaılardy boldyrmaý jónindegi aldyn alý jumystaryn júrgizý kerek.
Prezıdent Tótenshe jaǵdaılar mınıstrligin vedomstvo qyzmetkerleriniń áleýmettik, sonyń ishinde turǵyn úıge jáne jataqhanaǵa qatysty máselelerin sheshýge jáne qamtamasyz etýge, sondaı-aq kásibı kadrlardyń daıyndyq deńgeıin arttyrýǵa qabiletti ınstıtýt retinde aıtarlyqtaı kúsheıtý qajet ekenin aıtty.
Memleket basshysy Tótenshe jaǵdaılar, İshki ister jáne Qorǵanys mınıstrlikteriniń órt sóndirý bólimsheleriniń jeke quramymen, sondaı-aq órtti aýyzdyqtaýǵa tartylǵan eriktilermen kezdesti.
Qasym-Jomart Toqaev tótenshe jaǵdaıdy joıýǵa atsalysqan barlyq azamattyń jasaǵan erligi úshin alǵys bildirip, olar nagradalar men syılyqtarǵa usynylatynyn aıtty.
Prezıdent materıaldyq úles jaǵdaıyn jaqsartý, turǵyn úımen qamtamasyz etý jáne kadrlar daıyndaý úshin jaǵdaı jasaý jóninde sharalar qabyldanatynyn jetkizdi.
