Elimizde sońǵy kezderi hıdjab kıý máselesi ýshyǵyp tur. Eldegi aıtys, talas-tartys, pikirtalastardyń deni osynyń tóńireginde, dep habarlaıdy Almaty-akshamy.kz.
Buǵan deıin, Mádenıet jáne aqparat mınıstri Aıda Balaevanyń mektepte hıdjab kıý máselesine qatysty pikirin bergen edik.
QR Prezıdent janyndaǵy Ulttyq quryltaı múshesi, belgili zańger Aıgúl Orynbek te hıdjab máselesin kóterip, jazba jarıalady.
«Hıdjabqa» naqty ári túbegeıli tosqaýyl qoıatyn Zań joq!
Qazaqstan – quqyqtyq ári zaıyrly memleket. Sondyqtan, Qazaqstannyń saıası damýy men ekonomıkasyna, ıdeologıasyna tikeleı kedergi keri yqpaly bar, bárinen buryn bútin bir memlekettiń sanasyn ýlap qurdymǵa bastaıtyn – teris aǵymdarǵa túbegeıli tyıym salatyn ýaqyt jetti!
Bizdiń el, sanasy ýlanǵandardan az japa shekken joq. Salǵan jarasy men jaraqaty da jazylǵan joq. Kerisinshe, kún sanap ýshyǵyp: sanamyzdy ýlap, jaǵamyzdy jyrtyp, baltyrymyzdy tistelep, basymyzdy kórge tyǵyp barady...
Sırıaǵa jyldar boıy aǵylǵan bozdaqtarymyz, qaıtyp oralmaı qalǵan qandastarymyz kóp. Olardy keri ákelý men oı-kózqarasyn qalypty jaǵdaıǵa ózgertýge jumsalǵan qarjy da az emes. Sol mıllıondaǵan aqsha men ıdeologıalyq jobalar mardymdy nátıje bermegenin de kórip otyrmyz.
Nege maqsatty dep bólingen qarjynyń suraýy joq?
Bar bolsa, atoılatyp bastalǵan - jarnamasy jer jarǵan sol jobalardyń naqty jumysy men onyń nátıjesi nege kórinbeıdi?
Sonshama mıllıondaǵan qarjy qaıda ketti? Jumys jasalsa, ol qaıda? Nege joq?
Álde bul bireýdiń paıda kózi - «kólegeıli» bıznesi ma?
Eger, rasymen de dál osy qomaqty qarjylar maqsatty jumsalsa, elimizdiń ıdeologıasy men ishki ahaly dál bulaı aqsap, ishten «irip» jatpas edi..!
Qazaqstandaǵy qazaq ultynyń ózi - úı ishinen úı tigip, Otanyn satyp, týǵan tili men dininen bezip, az ýaqytta dinı nanym-senimderin ózgertpes edi... Ózara ekige tipti úsh-tórt tobyrǵa bólinip, qan tógisip qastaspas edi!
Týǵan anasyn tanymaı, áıelzatyn qorlap, talaq aıtyp, ult namysyn taptamas edi...! Bárinen buryn, beıbit kúnde kóterilister kóbeıip, adam shyǵyny da bolmas edi...!
Mynaý Taraz, Aqtóbedegi, jalpy el arasyndaǵy ishki «iritki» salýlar, teris aǵymǵa bet burýdyń saldarlarynan qalyń el qara jamyldyq.
Bul jantúrshigerlik qantógiste qanshama beıbit turǵyndar, tártip saqshylary men antyna adaldyq tanytqan aptal azamattarymyz jazyqsyz ajal qushty... Bul elimiz úshin – orny tolmas aýyr qasiret.
Osy rette, ashshy bolsa aqıqatty aıtqym keledi, júıedegi shyndyqty kótergim keledi: Bizdiń elde jat aǵymdarmen, ektremızm jáne terorızmmen kúresetin aty dardaı Ulttyq Qaýipsizdik komıteti bar. Bútir bir vedomstvodaǵy qyzmetkerlerdi qospaǵanda, ıaǵnı odan bólek İshki ister mınıstrliginde Ekstremızmmen kúres degen arnaıy qurylǵan departamentter men basqarmalar da bar. Onda jumys jasaıtyn jasaqtar men júzdegen qyzmetkerler taǵy bar. Biraq, olardyń jumyla atqarǵan ıaǵnı kózge kórinetin jumystary joq! Bar bolsa da, nátıjesi joq! Buǵan atalǵan qurylymdy da, olardyń qyzmetkerlerin de kinálaı almaımyn. Sebebi, bizdiń memlekettte dál osy terorızm men ekstrmızm, jat aǵymdar, «nıkab» pen «hıdjabqa» naqty ári túbegeıli tosqaýyl qoıatyn Zań joq!
Sol sebepti, Qazaqstan – qaýipsizdiginiń kepili bolar naq qadam jasap: saıası turǵyda ári senimdi túrde qaýipsizdikti qamtamasyz etetin shuǵyl túrde Zańdy qabyldaý qajet»! - dedi zańger jazbasynda.