Qaırat Nurtas 65 000 000 teńgege 180 bas jylqysyn satyp jatyr
Estrada juldyzy Qaırat Nurtastyń ákesi Nurtas Aıdarbekov «Instagramdaǵy» praqshasyna jarnama saldy.
«Dostar, satylatyn 100 bıe, 80 jabaǵy bar. Stepnogorsk qalasynda. Jas jylqylar. Aıyrbastaý qarastyrylady», - dep jazdy ánshiniń ákesi.
Qyzyǵy sol, jarnamadaǵy sýretter men vıdeodan satylatyn jylqylardyń bárine «KN» tańbasy basylǵany baıqalady, dep habarlaıdy Almaty-akshamy.kz.
Aıtý kerek, Nurtas Aıdarbekovtyń oqyrmandary bul jarnamany qyzý talqylady. Oqyrmandardyń biri «Nege qymbat KN degeni úshin be?», «Qaırattyń jylqylary bolǵym kelip ketti ǵoı», «Jaǵdaılaryńyz túk joq eken ǵoı», «Óleń aıtatyn jylqylar sıaqty», «Anda barsań KN, mynda barsań KN, endi jylqynyń jambasy da KN bopty ǵoı» dep renishterin bildirse, endi biri «Tańbany qatyrypsyzdar», -dep tańdanypty.
Jarnamada kórsetilgen nómirge habarlasyp, jylqylardyń baǵasyn bilgen edik. «Jylqyny tolyǵymen alatyn bolsańyz 65 mıllıon teńge bolady. Bólip alamyn deseńiz onda seksen jabaǵyny tolyǵymen alýyńyz kerek. Ázirge olar kishkentaı. Qazan aıynyń jıyrmalarynan ary qaraı alýyńyz kerek. Sonda kishkene durys bolady. Ótken jyly da satqanmyn. Ol kezde 220 000 teńgeden saýdalanǵan. Bıylda sondaı bolyp qalady. Bir bas alǵyńyz kelse, olaı satylmaıdy», - dedi Nurtas Aıdarbekov.