Birqatar ózgeris jasaldy.
Zań qabyldaý quqyǵy Májiliske tıesili bolady. Bul týraly Konstıtýsıalyq keńestiń apparat jetekshisi Baqyt Nurmuhanov aıtty, dep habarlaıdy Almaty-akshamy.kz QazAqparatqa silteme jasap.
«Zań shyǵarý prosesin jańǵyrtýǵa arnalǵan birqatar ózgeris jasaldy. Zań qabyldaý quqyǵy negizinen Májiliske tıesili bolady. Senatqa Májilis qabyldaǵan zańdardy maquldaý nemese maquldamaý quqyǵy beriledi. Retteıtin máselelerdiń mańyzdylyǵyn eskere otyryp, Konstıtýsıalyq zańdardy palatalardyń birlesken otyrysynda qabyldaý qoldaý tapty. Úkimetke adam ómiri men densaýlyǵyna, memlekettiń qaýipsizdigine, basqa da qundylyqtarǵa aıryqsha qaýip tóngen jaǵdaıda zań kúshi bar normatıvtik-quqyqtyq aktiler qabyldaý quqyǵy berildi», - dedi ol Ortalyq komýnıkasıalar qyzmetindegi baspasóz máslıhatynda.
Onyń aıtýynsha, elimizdiń Ata zańyna engiziletin túzetýler men ózgertýler jobasynyń aýqymdy bóligi adam quqyqtary máselelerine arnalǵan.
«Byltyr Qazaqstannyń Qylmystyq kodeksinen jáne basqa zańdarynan ólim jazasy alynyp tastaldy. Endi bul uǵym Ata zańnan joıylyp otyr. Osylaısha, biz Qazaqstan is júzinde de, zań júzinde de ólim jazasy joq memleket dep aıta alatyn bolamyz. Ombýdsmen ınstıtýty týraly jeke bap qarastyryldy. Azamattardyń ótinish berýine jol ashyp, Konstıtýsıalyq keńesti Konstıtýsıalyq sotqa aınaldyrý bastamasyn erekshe atap ótkim keledi. Konstıtýtsıalyq sot tóreligi boıynsha dúnıejúzilik qaýymdastyqqa múshe 118 eldiń 78-inde Konstıtýsıalyq sot qurylǵan. 12 memlekette Konstıtýtsıalyq keńes jumys isteıdi. Qalǵandarynda bul fýnksıany Joǵarǵy sot jáne basqa organdar júzege asyrady. Osy oraıda Qazaqstan álemde eń keń taraǵan jáne tıimdi modeldi tańdap otyr dep aıta alamyz», - dedi Baqyt Nuruhanov.