Saılaýaldy ýádesin oryndamaǵan depýtatty saılaýshylar keri qaıtarýǵa múmkindik alady. Bul týraly Konstıtýsıalyq keńestiń apparat jetekshisi Baqyt Nurmuhanov aıtty, dep habarlaıdy Almaty-akshamy.kz.
«Respýblıka Prezıdenti Qasym-Jomart Toqaevtyń bıylǵy Qazaqstan halqyna Joldaýy elimizde júrgizilip jatqan demokratıalyq prosesterge tyń serpin berdi. Onda Jańa Qazaqstannyń kelbeti, ony qurý baǵytynda turǵan mindetter jáne ol mindetterdi sheshý joldary anyq kórsetildi. Aıtylǵan bastamalardyń kópshiligi Ata zańda bekitilgen qoǵam men memlekettiń negizderin qozǵaıdy. Osy maqsatta qurylǵan jumys toby Konstıtýsıaǵa túzetýlerdiń jobasyn usyndy. Jumys tobyna memlekettik organdarmen qatar úkimettik emes uıymdardyń ókilderi jáne elimizdegi tanymal zańger-ǵalymdar qatysty. Zań jobasynda qazirgi tańda elimizde qalyptasqan sýperprezıdenttik basqarý nysanyn odan ary jetildirý kózdelgen. Bul maqsatty Memleket basshysy óziniń birqatar ókilettigin basqa organdarǵa beredi nemese olarmen kelise otyryp atqarady. Bul sońǵy jyldary elimizde júrgizilip jatqan ortalyqsyzdandyrý prosesiniń jalǵasy», - dedi ol Ortalyq komýnıkasıalar qyzmetindegi baspasóz máslıhatynda.
Sonymen qatar, ol 2017 jyly elimizde bolǵan úshinshi Konstıtýsıalyq reformanyń nátıjesinde Memleket basshysy óziniń birqatar ókilettigin Parlament pen Úkimetke bergenin eske saldy.
«Parlament pen jergilikti ókildi organdardyń rólin kúsheıtý kózdelgen. Palatalardy jasaqtaý tártibi men olardyń fýnksıalarynda da da eleýli ózgerister bar. Prezıdenttiń Senattaǵy kvotasy 15-ten 10-ǵa deıin qysqartylyp, onyń 5-eýin Qazaqstan halqy Assambleıasy usynatyn bolady. Májilis saılaýynda aralas saılaý júıesi engiziledi. Májilistiń 30 paıyz depýtattary 1 mandatty aýmaqtyq saılaý okrýgteri boıynsha saılanady jáne saılaýaldy ýádesin oryndamaǵan depýtatty saılaýshylar keri qaıtarýǵa múmkindik alady», - dedi Baqyt Nurmuhanov.