Almatyda Qazaqstannyń halyq jazýshysy, memleket jáne qoǵam qaıratkeri Sherhan Murtazanyń týǵanyna 90 jyl tolýyna arnalǵan «Sherhan Murtaza – zamana shyndyǵyn aıtqan zańǵar tulǵa» atty halyqaralyq ǵylymı-tájirıbelik konferensıa ótti.
Konferensıa basynda, QazUÝ Basqarma Tóraǵasy-Rektor Túımebaev Janseıit Qanseıituly Sher atamyzdyń 90 jyl tolýymen quttyqtap, Qazaq jýrnalısıkasyna qosqan úlesi - halqymyzdyń ǵasyrlar boıy mańyzyn joımaıtyn qazyna ekenin sózinde tıek etti. Konferensıaǵa memleket jáne qoǵam qaıratkerleri, BAQ basshylary men ókilderi, belgili sheteldik jáne otandyq ǵalymdar qatysty.
Konferensıa aıasynda ulttyq ıdeologıa, aqparattyq qaýipsizdik, qazir belsendi qoldanysqa engen jańa medıa trenderine qatysty túıtkildi máseleler talqylandy. Praktıkalyq bilik pen teorıalyq bilimdi ushtastyrýdyń, ishki garmonıasyn retteýdiń joldary zerdelendi.
Qazaq jýrnalısıkasynyń metri, klasık jazýshy Sherhan Murtaza 1932 jyly 28 qyrkúıekte Jambyl oblysy, Jýaly aýdany, Myńbulaq aýylynda dúnıege kelgen. 1955 jyly M.V. Lomonosov atyndaǵy Máskeý memlekettik ýnıversıtetiniń jýrnalısıka fakúltetin támamdaǵan. «Lenınshil jas» (qazirgi «Jas Alash») gazetiniń, «Sosıalısik Qazaqstan» (qazirgi «Egemen Qazaqstan») gazetiniń tilshisi, ádebı qyzmetkeri boldy. 1963-1970 jyldary «Lenınshil jas» gazetiniń redaktory, «Jazýshy» baspasynyń, «Jalyn» almanaǵynyń, «Juldyz» jýrnalynyń bas redaktory, Qazaqstan Jazýshylar odaǵy basqarmasynyń ekinshi hatshysy, «Qazaq ádebıeti» gazetiniń bas redaktory ári Qazaqstan Jazýshylar odaǵy basqarmasynyń hatshysy, 1989-1992 jyldary «Egemen Qazaqstan» gazetiniń bas redaktory, 1992–1994 jyldary QR memlekettik teleradıo kompanıasynyń tóraǵasy bolyp istedi. QR Parlamentiniń Májilis depýtaty bolǵan.
Jazýshynyń ár jyldary kóptegen kitaptary jaryq kórgen. Shara barysynda Jýrnalısıka fakúltetinde Sherhan Murtaza aýdıtorıasynyń ashylý saltanaty rásimi ótti.
Saltanatty sharaǵa kórnekti aqyn-dramatýrg, Memlekettik syılyqtyń laýreaty Nurlan Orazalın, QR Parlamenti Májilisiniń depýtattary Darhan Myńbaı, Janarbek Áshimjan, «Ana tili» gazetiniń bas redaktory Qalı Sársenbaı, «Qazaq gazetteri» JSHS basshysy Shámshıdın Pátteev, ál-Farabı atyndaǵy QazUÝ basshylyǵy jáne oqytýshy ǵalymdar men stýdentter qatysty. Jazýshy-jýrnalıstiń ómiri men shyǵarmashylyǵynan mol habar berip, zamanaýı tehnıkamen jabdyqtalǵan oqý zaly shákirtterdiń sheberligin shyńdap, jazý mashyǵyn qalyptastyrýǵa úlken kómegin tıgizeri sózsiz.
Bul – óskeleń urpaqty tulǵalar arqyly, olardyń is-ónegesi mysalynda tárbıeleýdiń úlgisi.
Shara barysynda, Almaty qalasy ákiminiń keńesshisi Mamaı Ahetov Sher atamyzdyń 90 jyldyǵymen quttyqtap, Almaty qalasy ákimi Erbolat Dosaevtyń arnaıy quttyqtaýyn jetkizdi jáne QR senat tóraǵasynyń keńesshisi Bıbigúl Jeksenbaı, senat tóraǵasy Máýlen Áshimbaevtyń Astana qalasynan kelgen arnaıy quttyqtaýyn tabys etti.
Konferensıada kórshi elderdegi Ózbekstan, Túrkıa, Reseı, Vengrıa ǵalymdarynyń júrekjardy quttyqtaýyn Led ekran arqyly kórsetti. Konferensıa barysynda ulttyq ıdeologıa, aqparattyq qaýipsizdik, qazir belsendi qoldanysqa engen jańa medıa trenderine qatysty túıtkili máseleler jan-jaqty talqylandy. Uıymdastyrýshylardyń aıtýynsha, aldaǵy ýaqytta konferensıa materıaldary ǵylymı jınaqta jarıalanayn bolady.
IýNESKO-nyń jýrnalısıka jáne komýnıkasıa kafedrasynyń oqytýshylary Qutpanbaeva J., Jetpisbaeva M.