Jıgýlı Daırabaev Almatydaǵy jas mamandarmen agrarlyq sektordy damytý máselelerin talqylady.
Prezıdenttikke kandıdat Qazaq ulttyq agrarlyq zertteý ýnıversıtetiniń stýdentterimen, oqytýshylarymen jáne qyzmetkerlerimen kezdesti.
Kandıdat álemniń jetekshi agrarlyq derjavalarynyń tájirıbesi Aýyl sharýashylyǵyn tabysty damytý tek ǵylym, bilim, óndiristiń ıntegrasıasy negizinde ǵana múmkin ekenin kórsetip otyrǵanyn atap ótti. Onyń aıtýynsha, bizdiń fermerler ınovasıalyq tehnologıalardy, jańa joǵary ónimdi sorttardy, joǵary ónimdi tuqymdardy tezirek engizgen jaǵdaıda ǵana Qazaqstan azyq-túlik qaýipsizdigin qamtamasyz ete alady.
- Ókinishke oraı, ǵylymı-zertteý qyzmetiniń sapaly nátıjeleri agrarlyq óndiriske jetpeıdi. İske asyrý júıesi jumys istemeıdi. Komersıalandyrý jáne transfert ortalyqtaryn, fermerlerge jańa tehnologıalar, jańa sorttar men tuqymdar týraly bilim berý ortalyqtaryn qurýǵa erekshe nazar aýdara otyryp, ǵylymnyń uıymdyq qurylymyn ózgertý qajet. Naqty jumys isteıtin ǵalymdar laıyqty eńbekaqy alýy úshin agrarlyq ǵylymdy qarjylandyrý sqemasyn ózgertý qajet, – deıdi Jıgýlı Daırabaev.
Ol sondaı-aq ǵylymı zertteýlerdi qarjylandyratyn agroqurylymdardy yntalandyrý máseleleri boıynsha zańnamadaǵy ózgeristerdi qısyndy sońyna deıin jetkizý qajettigin atap ótti.
Kezdesý barysynda kandıdat ǵylymı-zertteý ınstıtýttaryn qarjylandyrý keshendi jáne júıeli bolýy tıis ekenin aıta kelip, eldegi ǵylymı qyzmettiń damýyna barynsha kúsh salýǵa nıetti ekendigine sendirdi.
Esterińizge sala keteıik, saılaý naýqany 21 qazanda bastalyp, saılaýǵa bir kún qalǵanda, ıaǵnı, 19 qarashada aıaqtalady. Bul kún respýblıka boıynsha tynyshtyq kúni bolady. Prezıdent saılaýy 20 qarashada ótedi.