Ol máseleni endi aıtystaǵydaı óleń jolymen emes, depýtattyq saýalmen jetkizetinin aıtty.
Májilistiń kýlýarynda jańadan saılanǵan depýtat Rınat Zaıytov depýtat retinde qandaı másele kóteretinin aıtty, dep habarlaıdy Almaty-akshamy.kz Azattyq Ruhy-na siltime jasap.
«Májiliste aıtysta kóterilip júrgen máseleler kóteriledi. Óleń jolymen emes, depýtattyq saýal retinde», - dedi Rınat Zaıytov.
Jańadan saılanǵan depýtat áleýmettik jelilerde aıtylyp júrgen saılaýdaǵa falsıfıkasıa máselesin tabandylyq tanytyp júrgen adamdardyń tıisti organdarǵa júginip, aıaǵyna deıin jetkizýi qajet ekenin aıtty.
«Saılaýdaǵy falsıfıkasıaǵa ózim de qarsymyn. Basynda birmandattyq saılaý okrýginen kandıdatýramdy aldym. Odan keıin «AMANAT» partıasynyń partıalyq tizimimen usynysqa kelisim berdim. Óńirlerdi aralap, halyqpen kezdeskenimdi kórdińizder. Jasandy kezdesý emes, halyqpen baılanysýǵa tyrystyq. Óz basym halyqtyń senimi men daýysy arqyly óttim dep aıta alamyn», - dedi jańa depýtat Májilistiń kýlýarynda.
Ol partıalyq básekede «AMANAT» tolyqqandy jeńiske jetkenin aıtty.
«Osy 7 partıanyń ishinen «AMANAT» partıasy tolyqqandy jeńiske jetti dep aıta alamyn. Ótirik emes, shyn. Oǵan moraldyq, tolyq quqyǵym bar. Kóp máseleni sheshkim keledi. Eń aldymen, til máselesi», - dedi Rınat Zaıytov.