Bir ókinishtisi, jol apaty bir balanyń ómirin jalmady.
Jergilikti polısıa qyzmeti mundaı málimetterdi “Joldardaǵy balalardyń qaýipsizdigi” respýblıkalyq jedel aldyn alý is-sharasy aıasynda balalardyń jol-kólik jaraqatynyń sebepteri men jaǵdaılaryna arnaıy júrgizgen taldaýdy eskere otyryp usyndy, dep habarlaıdy Almaty-akshamy.kz Polisia.kz-ke silteme jasap.
Bıylǵy jyldyń 2 aıynda Almaty joldarynda balalardyń qatysýymen bolǵan 95 jol-kólik oqıǵasy tirkeldi, sonyń saldarynan 107 bala zardap shekti, 1 bala qaıtys boldy.
Analıtıkalyq málimetterge sáıkes, balalar kóbinese joldyń júrý bóligin kesip ótý kezinde zardap shegedi – 60 JKO, kedergige soǵylýyna baılanysty – 3 JKO, kólik quraldarynyń soqtyǵysýy nátıjesinde 26 JKO jáne t.b. Sonymen qatar balardyń zardap shegýimen, jyldamdyqty shekten asyrýdyń sebebinen 20 JKO, manevr jasaý erejesin buzýdan – 48 JKO, jaıaý júrginshilerge basymdyq bermeýge baılanysty – 21 JKO, jol qıylysynan ótý erejesin buzý nátıjesinde – 6 JKO tirkeldi.
Táýliktik ýaqyt boıynsha taldaý kelesideı: saǵat 06:00-den bastap 18:00-ge deıin 60 JKO oryn aldy, 27 JKO – 18.00-den bastap 24.00-ge deıin, 24.00-den 06.00-ge deıingi aralyqta taǵy 8 JKO boldy. Kóbinese jol-kólik oqıǵalaryna 16-17 jas (30 jol-kólik oqıǵasy), 12-13 jas (13 jol-kólik oqıǵasy), 10-11 jáne 14-15 jas (11 jol-kólik oqıǵasy) aralyǵyndaǵy balalar túsedi. Balalardyń qatysýymen bolǵan JKO-nyń kópshiligi seısenbide (18 JKO), jumada (16 JKO), dúısenbide jáne sársenbide (árqaısysy 13 JKO) tirkeldi. Sondaı-aq Almaty polısıasy, jolda júrý erejelerin naqty bilý jáne buljytpaı saqtaý – balańyzdyń qaýipsizdigi men densaýlyǵynyń kepili ekenin eske salady.