Túrkistan oblysy polısıa departamentiniń bastyǵy Murat Qabdenov Túrkistan oblysy Tólebı aýdany Zaǵambar aýylynda kámeletke tolmaǵan qyzdy zorlaý oqıǵasyna qatysty túsinikteme berdi, dep habarlaıdy almaty-akshamy.kz.
Aıtýynsha, áleýmettik jelilerde 24 sáýirde Túrkistan oblysy Tólebı aýdany Zaǵambar aýylynda bolǵan oqıǵa týraly jalǵan aqparat taralýda. 24 sáýirde kámeletke tolmaǵandy zorlaý faktisi boıynsha qylmystyq is qozǵaldy. Kámeletke tolmaǵan kúdikti ustalyp, qamaýǵa alyndy. Saraptama taǵaıyndaldy jáne qylmystyq is sotqa joldanady.
«Sonymen qatar, 25 sáýirde polısıaǵa bótenniń múlkin órteý týraly habarlamalar tústi. Atalǵan faktiler boıynsha qylmystyq ister qozǵaldy. Zardap shekkender men qurbandar joq. Bótenniń múlkin órteý faktisine qatysqandardyń barlyǵy anyqtalyp, ustaldy jáne qamaýǵa alyndy. Tergeý jalǵasýda», – dedi ol.
Atalǵan jaıttar boıynsha naqty aqparat oqıǵa bolǵan kúni Polısıa departamentiniń resmı paraqshalarynda jarıalandy.
Vedomstvo basshysynyń aıtýynsha, qazirgi ýaqytta Zaǵambar aýylynda jaǵdaı turaqty, oblys ákimi jáne barlyq memlekettik organdar basshylarynyń tóraǵalyǵymen aýyl turǵyndaryna jıyn ótkizilip, tıisti túsindirý jumystary júrgizildi, zań sheńberinde sheshim qabyldanatyny eskertildi.
«Internet jelisinde taralǵan, ıaǵnı «Birneshe oqýshy ustaldy, jábirlenýshi júkti jáne birqatar jigitter zorlady» degen aqparattar shyndyqqa janaspaıdy. Qazirgi tańda jalǵan aqparat taratqan birqatar avtorlar anyqtaldy, olarǵa qatysty ákimshilik jáne qylmystyq sharalar qabyldanýda. Barsha azamattarǵa resmı aqparat kózderinen alynǵan aqparatqa senýge shaqyramyz. Jalǵan aqparat taratqany úshin jaýapkershilik qarastyrylǵanyn eskertemin», – dep aıaqtady sózin ol.