Búgin sınoptık mamandar elimiz boıynsha aldaǵy kúnderge arnalǵan aýa raıy boljamyn jasady, dep habarlaıdy almaty-akshamy.kz.
Aýa raıy boljamymen "Qazgıdromet" RMK-nyń baspasóz hatshysy Alına Ismaǵulova tanystyrdy.
"28-29 sáýirde atmosferalyq frontaldy bólikterdiń áserinen Qazaqstannyń basym bóliginde jańbyr jaýyp, naızaǵaı oınaıdy dep kútiledi, 28 sáýirde ońtústik, 29 sáýirde soltústik-batys jáne soltústik óńirlerde qatty jańbyr jaýady, burshaq jaýýy múmkin. 29 sáýirde túnde respýblıkamyzdyń ońtústik-shyǵysyndaǵy taýly aımaqtarda jaýǵan jańbyrdyń arty qarǵa ulasady. Qazaqstan boıynsha jel kúsheıip, ońtústik jáne ońtústik-batys óńirlerde shańdy daýyl soǵady dep kútiledi", - dedi ol respýblıkalyq komýnıkasıalar ortalyǵyndaǵy brıfıń barysynda.
Temperatýralyq fonǵa keletin bolsaq, jalpy alǵanda kúndiz kún birtindep joǵarylaıdy.
"Alaıda 27-28 sáýirde túnde elimizdiń soltústik jartysynda synap baǵany -1-8 gradýs sýyqty kórsetedi", - deıdi maman.
Sondaı-aq sınoptıkter 2024 jylǵy 27 sáýirge arnalǵan órt qaýpi boljamymen de bólisti.
"Mańǵystaý oblysynyń basym bóliginde, Qyzylorda oblysynyń ortalyǵy men ońtústiginde joǵary órt qaýpi saqtalady. Sonymen qatar, Túrkistan oblysynyń soltústiginde, Atyraý oblysynyń ońtústiginde de órt qaýpi kútiledi", - dedi Alına Ismaǵulova.