«Eýrazıa» kınofestıvali kezekti ret óziniń Ortalyq Azıadaǵy eń aýqymdy jáne bedeldi mádenı is-shara ekenin dáleldep otyr.
Bıyl qazylar alqasynyń 70%-yn Túrkıa, Qytaı, Fransıa, Ózbekstan, Qyrǵyzstan, Reseı, Shvesıa, Marokko sıaqty elderden kelgen sheteldik sarapshylar tolyqtyrdy, dep habarlaıdy aqshamnews.kz.
Mádenıet jáne aqparat mınıstrlininiń málimetinshe, bul festıváldiń halyqaralyq deńgeıde moıyndalǵanyn jáne oǵan degen qyzyǵýshylyqty aıqyndaıdy.
Mádenı shara 24-30 qarasha aralyǵynda Almatyda ótedi. Kıno áleminiń úzdik mamandary – rejıserler, akterler, senarıster men kórermender bir alańda toǵysady. Olar ózara pikir almasyp, zamanaýı kınonyń damýyndaǵy jańa ádisterdi talqylap, óz tájirıbesimen bólise alady.
Festıváldiń negizgi baıqaýlary da erekshe nazarda. Halyqaralyq baıqaýǵa álem kınematografıasynyń ańyzy, Kann kınofestıvaliniń «Altyn pálma butaǵy» ıegeri Nýrı Bılge Djeılan tóraǵalyq eteli. Qazylar alqasynyń quramyna sondaı-aq Rano Shodıeva, Nada Ajarı Gıllon, qazaqstandyq rejıser Erlan Nurmuhambetov jáne qyrǵyz rejıseri Artyqpaı Súıindikov bar. Al Ortalyq Azıa jáne túrki álemi elderi baıqaýynda baq synasatyn týyndylardyń eń úzdigin basqa top anyqtaıdy. Qazylar alqasynyń tóraǵasy Lı Baohýa. Onyń shyǵarmashylyǵy negizinen mádenı mura taqyrybyna arnalǵan jáne kınosúıer qaýymnyń kóńilinen shyǵady. Qytaılyq rejısermen birge fılmderdi marokkolyq Abdelıla El Djaýharı, reseılik Alekseı Telnov jáne qazaqstandyq prodúser Janna Qýanysheva baǵalaıdy.
Festıválge sondaı-aq Azıa elderiniń kınematografıasyna erekshe kózqaras usynatyn NETPAC qazylar alqasy qatysady. Olardyń qatarynda Nına Kocheláeva, Gúlbara Tolomýshova jáne Andre Rafael Ivanov bar.
Kınofestıvaldiń júlde qory da kóńil qýantarlyq. Ol 20 mıllıon teńgeden asady. Baıqaýdyń bas júldesin jeńgen fılm 4 mıllıon teńgeni qanjyǵasyna baılaıdy. Bul otandyq jáne sheteldik kınematografısterdi shabyttandyratyny sózsiz.
Festıvál aıasyndaǵy kórsetilimder 25-30 qarasha aralyǵynda Kinopark 11 IMAX Esentai kınoteatrynda ótedi. Eń bastysy mádenı sharanyń keń aýdıtorıaǵa qoljetimdi bolýy úshin barlyq kórsetilimder tegin bolmaq.
Dástúrli festıváldiń negizin qalaýshy jáne uıymdastyrýshy – QR Mádenıet jáne aqparat mınıstrligi. Kınofestıvaldi tikeleı uıymdastyrý Sháken Aımanov atyndaǵy «Qazaqfılm» ulttyq kınostýdıasyna júktelgen.
Aıta keteıik, is-sharaǵa KAZ Minerals ken óndirý kompanıasy, Sarens Kazakhstan, Salem Entertainment, Kinopark Theatres kınoteatrlar jelisi, Eurasian Resources Group (ERG), Astana Motors demeýshilik etti.
Bas demeýshi: Bazis-A halyqaralyq qurylys kompanıasy.
Aqparattyq seriktester: «Habar» AQ, Qazaqstan telearnasy, «NTK» telearnasy, «Evropa plús Kazahstan», «Eldoradıo», Qazaq Gazetteri, Egemen Qazaqstan, «Kazahstanskaıa pravda», «Antena Kazahstan», «Novoe pokolenıe», ORDA, «QazAqparat» HAA, ArbatMedia, El.kz, Baq.kz.