İnterContinental alańynda Women In Business halyqaralyq forýmy ótti.
Aýqymdy sharaǵa kásipker, sarapshy, lıderler qatarynan 350-den asa qyz-kelinshek jınaldy. Áıelder kásipkerliginde kezdesetin ózekti syn-qater, sondaı-aq jańa múmkindik pen qoldaý sharalary talqylandy. Forýmǵa qatysýshylar áıelder kásipkerligin qarjylandyrý, bıznes negizine oqytý men kedergini joıý máselesine nazar aýdardy. İs-shara barysynda spıkerler ekonomıkalyq ósý úshin genderlik teńdiktiń mańyzyna mán berdi.
«Álemdik jalpy ishki ónimdegi 7 trln dollarǵa deıingi shyǵyn áıel men er arasyndaǵy eńbekaqy alshaqtyǵy saldarynan týyndaıdy. Elimizde erlerge qaraǵanda, áıelder 26 paıyzǵa az tabys tabady. Áıelder kásipkerligin qoldaý – ózekti sheshimniń biri», – dep málimdedi Halyk Bank basqarma tóraıymy.
Rasynda, álem kúrdeli syn-qaterge tap boldy, sonyń saldary elimizdiń ekonomıkasyna da áser etýde. Ekonomkanyń sapaly ári turaqty ósýi, halyqtyń ál-aýqatyn arttyrý – memlekettiń ekonomıkalyq saıasaty, júrgizilip jatqan reformanyń nátıjesi.
«Bıznesti damytýǵa menshik, muragerlik pen áıelderdiń qarjylyq qyzmetine, qaryz-qarajatqa ońaılatylǵan qol jetimdilik máselesine zańnamalyq kepildikti qamtamasyz etý qajet. Sondaı-aq, ekonomıkanyń túrli salasynda tabysty jumys isteýde daǵdy men bilim berýge, áıelderdiń bilimi men kásibı daıyndyǵyna ınvestısıa salý mańyzdy», – Dúnıejúzilik banktiń Ortalyq Azıa boıynsha óńirlik dırektory Tatána Proskýrákova.
Forým aıasynda salyq salý máselesine qatysty sheberlik sabaǵy, joba aıasynda onlaın oqýdan ótken Belesteri baıqaýynyń 17 jeńimpazy marapattaldy. Joba jeńimpazdary aýyl áıelderi men jastar jeke kásip bastaýǵa, ony damytýǵa grant ıelendi. Joba shaǵyn kásip bastaýshyǵa da, bıznesti aýqymdaýǵa da úsh túrli bilim baǵdarlamasyn usyndy. 12 jyl ishinde 137 myńnan asa qyz-kelinshek oqýǵa qatysty. 10 myńǵa jýyq shaǵyn bıznes pen 13 myńnan asa jumys orny quryldy.
«Women in Business – jaı ǵana forým emes, bıznes pálsapasy, kontent pen netvorktiń sapaly deńgeıiniń transformasıasy. Bıyl biz áıel kásipkerler jańa syn-qaterge qalaı qarsy turyp, makroekonomıkalyq ózgeristen aqparattyq qaýipsizdikke deıingi jahandyq máseleni sheshýge qalaı yqpal ete alatynyn talqyladyq. Áıelder bıznesine jańa múmkindik ashyp jatqan sıfrlyq transformasıa men jańa tehnologıalarǵa basa nazar aýdaryldy», – dep qorytyndylady forým uıymdastyrýshysy Aqerkin Eralıeva.