«Alataý» dástúrli óner teatrynda «Alatau FM radiosy» spektakliniń premerasy men VIII teatr maýsymynyń resmı ashylý saltanaty ótti.
Teatr ujymy aldaǵy maýsymdaǵy jańalyqtarymen bólisip, teatr alańynda ártisterdiń qyzyl kilemdegi sherýi men merekelik konsert uıymdastyryldy.
– Búgin VIII teatr maýsymynyń resmı ashylý saltanaty ótip jatyr. Osy oraıda «Alatau FM radiosy» spektakliniń premerasy bolyp jatyr. Biz ótken maýsymdy premeramen jaýyp, premeramen ashyp jatyrmyz. Aldaǵy ýaqytta kóptegen qoıylymdar qoıamyz degen jospar bar. Sonyń ishinde Birjan sal, Nurǵısa Tilendıevtiń 100 jyldyǵyna, Abaı Qunanbaevtyń 180 jyldyǵyna arnalǵan qoıylymdar josparlanýda. Bizdiń teatrymyzda ónerli akterlerimizden bólek, ánshi, bıshi jáne kúıshilerimiz bar,– dedi «Alataý» dástúrli óner teatrynyń dırektory Maqsat Nuralıev.
– «Alatau FM radiosy» mýzykalyq komedıa ózimizdiń qazaqstandyq avtorlardyń týyndysy. Jalpy qazirgi ýaqyttaǵy máselelerdi qamtıtyn qoıylym. Spektákl óz armanyńa senip, isińe adal bolýdy jáne jaqyndaryńa kóńil bólý sekildi izgi qarym-qatynasty nasıhattaıdy. Qoıylym shaǵyn radıostansıanyń búkil qalanyń daýysyna aınalǵany týraly oqıǵany baıandaıdy. Sondaı-aq, bul eń qıyn jaǵdaıdada ózińe jáne armandaryńa senýdiń arqasynda tyǵyryqtan shyǵýdyń jolyn tabýǵa bolatyndyǵy týraly qoıylym,– dedi qoıylym rejıseri Eslám Nurtazın.
«Alatau FM radiosy» jańa mýzykalyq komedıasynda kórermenderdi ázil-qaljyńy jarasqan búgingi kúnniń keıipkerleri men jandy daýystaǵy erekshe ánderin usyndy. Kórermen jasyna qaramastan, bul qoıylym barlyǵyna naǵyz mereke sezimin syılady.
