Shaharymyzda qalalyq Qoǵamdyq keńestiń uıytqy bolýymen «Sıntetıkalyq esirtkiqumarlyqqa qarsy is-qımyl: Almaty qalasynyń tájirıbesi, kedergisi men keleshegi» atty alqaly jıyn ótti.
Ózekti áleýmettik mándegi máselege arnalǵan basqosý jıynyna qalalyq salalyq basqarma mamandary, quzyrly organ ókilderi, dárigerler, psıhologtar, qoǵamdyq uıymdar men azamattyq qoǵam músheleri qatysty. Jıyndy ashqan Almaty qalasy Qoǵamdyq keńesiniń tóraǵasy Altynaı Kóbeeva jıylǵan qaýymǵa «dóńgelek ústel» úrdisindegi basqosýdyń maqsatyna toqtalyp, ıgilikti iste sáttilik tiledi.
Sharada qalamyzdaǵy sıntetıkalyq nashaqorlyqqa qarsy kúrestiń ózekti máseleleri talqylandy. Basqosýda memleket tarapynan atqarylatyn sharalar, mamandar aldynan shyǵatyn kedergiler, esirtkige táýeldiliktiń aldyn alý men oǵan kórsetiler kómekti jaqsartý joldary qarastyryldy. Alqa-qotan basqosýǵa qatysýshylar ózara tájirıbe almasýǵa, atalǵan sharalardy jergilikti deńgeıde júzege asyrýǵa qajet praktıkalyq usynystardy taldaýǵa múmkindik tapty.
Alqaly jıyndy Altynaı Ormanqalıqyzy men Nurjan Baýyrjanuly júrgizip otyrdy. QR Parlament Senatynyń depýtaty Janna Asanova atalǵan jıynǵa onlaın túrde qatysyp, áleýmettik aýqymdy basqosýǵa qatysýshylardyń jandy dıalogqa ulasýyna degen ıgi tilegin bildirip, kóbine-kóp otbasylyq faktormen tyǵyz baılanysty osy bir áleýmettik keseldiń aldyn alýǵa qatysty laıyqty baǵdaryn berdi. Moderator Nurjan Jaqypov 14 jasqa deıingi jas órenderdi ulttyq ıdeologıalyq turǵyda tárbıeleýdiń tujyrymdamasyna toqtaldy.
«Esirtkige áýes ár alýan mekemelerden kelgen eresekter ǵana emes, kámeletke tolmaǵan jetkinshekter de keńes berýimizdi qalap, kómek suraıtyny ras. Bıyldyń ózinde esiritkige táýeldi 12 jasar balaǵa kómek surap, keńes alýǵa keldi. Qazaqta «aýrýyn jasyrǵan óledi» degen bar, osyndaı jaǵdaı oryn alyp otyrǵan soń, memleket pen qoǵam bul ózekti máselege erekshe mán berip, aıryqsha nazar aýdarýy qajet. Munyń ózi búgingi kúni esirtkige ońaı qol jetkizýge bolatynynyń dáleli emes pe. Kóńilge qaıaý túsiretin mundaı keleńsiz kórinis qorqynyshqa aınalyp, vırtýaldy túrde etek alyp barady, – degen psıholog-addıktolog Ǵalıa Áljaparqyzy esirtkige táýeldilikke deıingi tulǵanyń qalyptasý faktorlaryn aıtyp berdi.