Ol ómiriniń 35 jylyn jýrnalısıka salasyna arnady.
Sum ajaldyń Mıhaıl Valerevıch Býrenkovty kútpegen jerden aramyzdan alyp ketkeni qabyrǵamyzdy qaıystyrdy. Árdaıym kóńildi júretin Mıhaıl Valerevıch adam boıyndaǵy talantty, adaldyqty, bilimdilikti joǵary baǵalaıtyn, dep habarlaıdy Almaty-akshamy.kz.
Mıhaıl Valerevıch Býrenkov 1964 jyly 14 jeltoqsanda Almaty qalasynda dúnıege kelgen. 1989 jyly Kırov atyndaǵy QazMÝ-dyń jýrnalısıka fakúltetin támámdaǵan.
1997-1998 jyldary «Moskovskıı komsomoles v Kazahstane» gazetiniń bas redaktory, keıin 2002 jylǵa deıin «Novoe pokolenıe» gazetiniń jaýapty hatshysy boldy.
2002 jyly «Kazahstanskaıa pravda» gazetine bas redaktordyń birinshi orynbasary bolyp aýysty.
2004-2005 jyldary Qazaqstan Respýblıkasy Prezıdenti Teleradıokompanıasynyń redaktor-senarısi, 2006 jylǵa deıin «Stolıchnaıa jızn» aptalyq gazetiniń bas redaktory boldy.
2006 jyly «Segodná» aptalyq gazetin basqardy.
2007-2008 jyldary «Eýrazıa» halyqaralyq kınofestıvaliniń baspasóz hatshysy, 2013 jylǵa deıin ADA jarnama agenttiginiń bas dırektorynyń orynbasary qyzmetin atqardy.
2014-2015 jyldary «Baspalar úıi» AQ redaktory, 2015-2020 jyldary «AiF Qazaqstan» gazetinde jaýapty hatshy, sholýshy qyzmetterin atqarǵan.
2020-2021 jyldary - «Vechernıı Almaty» gazeti bas redaktorynyń orynbasary. 2022 jyldyń qańtar aıynan bastap «Vechernıı Almaty» gazetiniń bas redaktory boldy.
«Altyn juldyz» syılyǵynyń laýreaty. Qazaqstan Respýblıkasy Aqparat jáne qoǵamdyq damý mınıstrliginiń «Aqparat salasynyń úzdigi» tósbelgisimen marapattalǵan.
Býrenkov Mıhaıl Valerevıch 35 jyldan astam shyǵarmashylyq qyzmetin jýrnalısıka salasyna arnap, ózin joǵary kásibı maman, bilikti jáne jaqsy basshy retinde kórsetti.
Sońǵy bir jarym jyl ishinde ol gazettiń aqparattyq kontent salasynda sapaly jumys jasady. «Vechernıı Almaty» gazetiniń damýyna, memlekettik aqparattyq saıasatty júzege asyrýǵa zor úles qosty.
Mıhaıl árdaıym kómektesýge, qysyl-taıań ýaqytta qol ushyn sozýǵa, moraldyq qoldaý kórsetýge daıyn jan edi. Sol sebepten onyń qazasy bizge qıyn tıdi, qatty qaıǵyrdyq. Onyń súıikti Almatysy da úlken qaıǵyny bastan keshirýde.
Mıhaıl Valerevıchtiń týǵan-týystary men jaqyndaryna qaıǵylaryna ortaqtasyp kóńil aıtamyz. Jatqan jeri jaıly, topyraǵy torqa bolsyn!