Nátıjesinde úzdik batalón anyqtalady.
Qurlyq áskerlerde úzdik batalón anyqtalyp jatyr, dep habarlaıdy Almaty-akshamy.kz.
«Qazaqstannyń Qarýly Kúshterinde 28 aqpan men 19 naýryz aralyǵynda oq atý daıarlyǵynan «Mergender batalóny» baıqaýy ótý ústinde.Elimizdiń barlyq óńirindegi polıgondarda jarysqa motoatqyshtar, tank, desanttyq-shabýyldaý batalóndary, sondaı-aq teńiz jaıaý áskerleri qatysyp jatyr»,- delingen Qorǵanys mınıstrliginiń baspasóz qyzmetiniń habarlamasynda.
Jaýyngerlik saıystar Memleket basshysy Qasym-Jomart Toqaevtyń áskerdiń jaýyngerlik qabiletin túbegeıli arttyrý jónindegi tapsyrmasyn iske asyrý aıasynda ótkizilýde.
«Bólimsheler oq atý daǵdysynan saıysqa túsip, sheberlikterin shyńdaýda. Batalóndar shtattyq qarýdan jáne jaýyngerlik mashınalardyń qarý-jaraǵynan kúndizgi jáne túngi ýaqyttarda atys jattyǵýlaryn oryndap jatyr. Bul ásker jeke quramynyń daıyndyq deńgeıin, sondaı-aq quramalar men bólimderdegi jaýyngerlik daıarlyqtyń tıimdiligin baǵalaýǵa múmkindik beredi», – dedi Jaýyngerlik daıarlyq departamentiniń bastyǵy – Bas shtab bastyǵynyń orynbasary general-maıor Dáýlet Ospanov.
Jarysqa qatysýshylardyń is-qımylyn Bas shtab komısıasy baǵalaıtyn bolady. Saıys qorytyndysy boıynsha Qurlyq áskerleriniń Úzdik batalóny anyqtalady.