Bul suraqqa Eńbek jáne halyqty áleýmettik qorǵaý mınıstri Serik Shápkenov jaýap berdi.
Qazaqstan Úkimetiniń músheleri ekpe alýǵa qatysty jıi týyndaıtyn suraqtardyń birine jaýap berdi, dep habarlaıdy Almaty-akshamy.kz QazAqparatqa silteme jasap.
Eńbek jáne halyqty áleýmettik qorǵaý mınıstriniń aıtýynsha, Qazaqstan zańnamasynda vaksınasıadan bas tartqany úshin ákimshilik nemese qylmystyq jaýapkershilik qarastyrylmaǵan.
«Halyq densaýlyǵy jáne densaýlyq saqtaý júıesi týraly» QR Kodeksiniń 77-babyna sáıkes, kez kelgen medısınalyq rásim, onyń ishinde vaksınasıa ekpe alýshynyń kelisimimen ǵana júrgiziledi», - dedi mınıstr.
Vdeomstvo basshysy Qazaqstan aýmaǵyna ınfeksıalyq jáne parazıttik aýrýlardyń ákelinýi jáne Qazaqstan Respýblıkasynyń búkil aýmaǵyna taralý qaýpi tóngen jaǵdaıda densaýlyq kodeksiniń 104-babynyń 1-tarmaǵy boıynsha QR bas memlekettik sanıtarlyq dárigeri Eýrazıa ekonomıkalyq odaǵynyń kedendik shekarasymen tuspa-tus keletin QR Memlekettik shekarasy arqyly ótkizý pýnktterinde shekteý sharalaryn, onyń ishinde karantın engizetinin eskertken.
«Osyǵan baılanysty, Qazaqstan Respýblıkasynyń bas memlekettik sanıtarlyq dárigeri tıisti qaýlylar qabyldaıdy. Bas memlekettik sanıtarlyq dárigerdiń №67 qaýlysynda kórsetilgen uıymdardyń/obektilerdiń COVID-19-ǵa qarsy vaksına almaǵan (turaqty medısınalyq qarsy kórsetilimderi bar jáne sońǵy 3 aı ishinde COVID-19-men aýyryp jazylǵan adamdardy qospaǵanda) qyzmetkerleri úshin kúndizgi rejımde jumysqa jiberilýine shekteý engizildi», - deıdi Serik Shápkenov.
Atalǵan qaýlynyń 6-1-tarmaǵynyń 1) tarmaqshasynda kórsetilgen uıymdardyń vaksına almaǵan qyzmetkerleri 7 kúnde bir ret PTR-test tapsyryp turýǵa mindettelgen. Osyǵan baılanysty, jumys berýshi: a) COVID-19-ǵa qarsy vaksınasıalaýdy almaǵan jumyskerge qashyqtyqtan jumys nysanyna kóshýdi usynýǵa (mundaı múmkindik bolǵan jaǵdaıda) quqyly; b) Qazaqstan Respýblıkasy Eńbek kodeksiniń 48-babynyń 1-tarmaǵyna sáıkes qashyqtan jumys isteýden bas tartqan ne jumysty oryndaý múmkindigi bolmaǵan kezde jalaqysy saqtalmaı shettetiledi. Bul rette, jumys berýshi ýaqytsha bolmaǵan qyzmetkerdiń mindetterin oryndaý úshin basqa qyzmetkerdi qabyldaýǵa quqyly bolady. c) jumysty qashyqtan oryndaý múmkindigi bolmaǵan jaǵdaıda jáne qyzmetker jumysty kúndizgi rejımde júzege asyrýǵa tilek bildirse, qyzmetker óz esebinen mindetti PTR-testileýden (7 kúnde 1 ret) ótýi qajet. Sonymen birge, taraptardyń kelisimi boıynsha mindetti PTR-testileý (7 kúnde 1 ret) jumys berýshiniń qarajaty esebinen júzege asyrylýy múmkin.
«Osylaısha, jumys berýshi vaksınalaýdan bas tartýǵa baılanysty qyzmetkerdi jumystan shyǵarýǵa quqyly emes. Sonymen qatar, qyzmetkerler ózderiniń eńbek quqyqtaryn qorǵaý úshin jumys berýshiniń ornalasqan jeri boıynsha tıisti ákimshilik-aýmaqtyq birliktiń eńbek ınspeksıasy jónindegi basqarmasyna ótinish jasaýǵa quqyly», - dep jazylǵan resmı jaýapta.