Qasterlí Táuelsízdíktíń 30 jyldyǵyna oraı dástúrlí sūhbatymyzdy jalǵastyramyz. Osyǵan oraı Abaı atyndaǵy Qazaq ūlttyq pedagogıkalyq unıversıtetíníń professory, fılologıya ǵylymdarynyń doktory T.Tebegenovtí sózge tartqan edík.
–Temírhan aǵa, Táuelsízdík sízge nesímen qymbat?
– Rasynda, egemen el bolu ata-baba amanatynyń oryndalǵanymen parapar. Dúnıede etek-jeńín jınaǵan, qarqyndap damyǵan Qazaq elí bar. Táube! Beıbít mekende síz ben bíz ǵūmyr keshudemíz. Artymyzdan qarakózder ósíp keledí. Olardy nóserden keıíngí jaıqalǵan báısheshekke teńeımín. Búgínde solardyń arasynda dárís beríp júrgen ózímdí baqytty sanaımyn.
– Jastar turaly oı qozǵadyńyz, tolyǵyraq aıtyp berseńíz?
– Ūly aqyn, oıshyl dana Abaı atamyzdyń esímímen atalatyn unıversıtette sabaq berudemín. Ásírese, óleń sózge jaqynmyn. Árdaıym shákírtteríme aqyl-keńesímdí aıtyp júremín. Kóbínese dárísterímde erkíndík beríp, keńesíp, píkír almasyp ótkendí jón kórem. Sonda aldyńyzdaǵy balanyń oıy serpílíp, ílímge tynysy ashylady. Sondaı-aq, oqytushy da shabyttanady. Jastarǵa úlken senímmen qaraımyn.
– Ómírlík ūstanymyńyz jónínde aıtsańyz?
– Fılosofıyalyq saual qoıyp otyrsyz. Adam bolyp, ǵalamǵa kelgennen keıín bírnársege ūmtylady. Jasymnan ákemníń qasynda júruge áues boldym. Atqa míndík. Seruen qūrdyq. Syrdyń boıynda talaı qyzyq kezder óttí. Tap-tamasha balalyq bal dáurendí keshtík. Eseıíp er jetkende baryp ūstanymǵa kóńíl bóledí ekensíń. Sízdíń sūraǵyńyzdyń mánín uaqytpen bírge qalyptasady demekpín.
– Elímízdíń bolashaǵyn qalaı elesteter edíńíz?
– Būl da pálsapalyq ūǵym. «Bíríńdí qazaq bíríń dos, kórmeseń ístíń bárí bos» deptí danyshpan Abaı. Ol ras. Qazaq halqy arǵy-bergí tarıhynda talaıdy kórdí. Nebír oqıǵalardy bastan ótkerdí. Bárín eńserdí. Qazír álem tanyǵan aıbyndy memleketke aınaluda. Endí osy bıíktí ūstap, ílgeríleı beru kerek. Alda ǵylym-bílímdí órkendetsek, ūtarymyz kóp bolmaq. Qazaqstannyń bolashaǵy jarqyn bolaryna senemín.
– Sūhbatyńyzǵa raqmet!