Qyzylsha - álemdegi eń juqpaly jáne ólimge ákeletin aýrýlardyń biri. Oǵan qarsy jalǵyz jáne senimdi qural - vaksınasıa.
Qyzylshany qyzylsha vırýsy dep atalatyn óte juqpaly vırýs týdyrady. Aýrý juqtyrǵan adammen baılanysqanda, sondaı-aq ol jótelgende ne túshkirgende aýa tamshylary arqyly juǵady, dep habarlaıdy Almaty-akshamy.kz.
No36 qalalyq emhananyń dırektory Gúljaınat Tilegenniń aıtýynsha, qyzylshamen aýyrǵandar bórtpe paıda bolǵanǵa deıin tórt kún jáne odan keıin tórt kún juqpaly bolady. Bul aýrýdyń taralýyn tejeýdi qıyndatady. Qyzylsha pnevmonıa, ensefalıt, tipti ólim sıaqty aýyr asqynýǵa ákelýi múmkin.
"Qyzylsha aýrýynyń aýyr zardaptaryna balalar óte osal keledi. Shyndyǵynda, qyzylsha damýshy elderdegi balalar óliminiń basty sebebiniń biri. Vaksınasıa - balalardy qyzylshadan qorǵaýdyń eń tıimdi ádisi. Vaksına qaýipsiz ári tıimdi jáne aýrýǵa qarsy uzaq merzimdi ımýnıtetti qamtamasyz etedi. Sol sebepti vaksına aýrýdy emdeýden áldeqaıda arzan», - deıdi Gúljaınat Tilegen.
Balalardy qyzylshadan qorǵaý úshin olardyń vaksınasıalanýy óte mańyzdy, óıtkeni tek vaksına qyzylshanyń órshý qaýpin azaıtyp, ómirdi saqtaýǵa kómektesedi.
«Birinshi egý 12 aılyq balalarǵa, ekinshisi olar 6 jasqa tolǵanda júrgiziledi. Qyzylshamen aýyratyn naýqastardyń kóbeıýine baılanysty Qazaqstanda qyzylsha, qyzamyq jáne parotıtke qarsy qosymsha jappaı ımmýndaý júrgizilip jatyr. Qazir bizdiń emhanada 6 aıdan 10 aı 29 kúnge deıingi balalarǵa egý júrgizilip jatyr. Kelesi aıdan (1 jeltoqsannan) bastap 2 jastan 4 jas 11 aı 29 kúnge deıingi balalar egiledi. Bul aýrý juqtyrǵan balalardyń 60%-ynyń josparly túrde ekpe almaýyna, kóp jaǵdaıda ata-analarynyń ekpeden bas tartýyna baılanysty», - dep tolyqtyrdy dáriger.
Sóziniń sońynda G. Tilegen Naýryzbaı aýdandyq SEBD-men birlesip profılaktıkalyq jáne epıdemıaǵa qarsy is-sharalar turaqty túrde júrgizilip jatqanyn, onyń aıasynda ekpe naýqanymen qatar, balalarǵa bilim berý uıymdarynda vaksınasıamen qamtýdyń shekti deńgeıi keminde 90%-dy quraýyn qadaǵalaý, sondaı-aq halyq arasynda aqparattyq-túsindirý jumystarynyń jalǵasyp jatqanyn basa aıtty.