Bala aǵzasyn dárýmenmen demep, ál-dármenin arttyrý úshin ony turaqty, ýaqtyly berýdiń mańyzy zor. Boıynda organızmge qajetti elementter quramy tolyq balalardyń qýaty mol, sergek ári myǵym bolady.
Dárýmender – taǵamdaǵy hımıalyq qosylys. Olardyń ósýge, damýǵa, zat almasýǵa jáne energıanyń tolyǵýyna ómirlik mańyzy zor. Olar óte az mólsherde qajet bolǵandyqtan mıllıgramen (mg) nemese mıkrogrammen (mkg) ólshenedi, dep habarlaıdy Almaty-akshamy.kz.
Balalardyń densaýlyǵy, ásirese, qys aılarynda álsireýi múmkin. Aýa temperatýrasynyń salqyndaýy saldarynan ata-analar balalardy taza aýada serýendetýdi sıretip ne tyıyp tastaıdy.
Sýyq «soqqydan» bala ımýnıteti tómendep, aýrýshań bolmas úshin dáriger Ázıza Ábdirasilqyzy jyl boıy jalǵap ishý kerek bazalyq dárýmender tizimin bólisti.
«Mezgil tańdamaı barlyq bala kúndelikti ishýi kerek bazalyq vıtamınder bar. Olar:
- Dz;
- omega 3;
- ıod;
- lesıtın;
- magnıı», dedi dáriger.
Qysta balany taza aýaǵa shyǵarýdy tyımaý kerek. Tek salqyn aýa raıynda durys kıindirý tártibin bilgen abzal.
«Qysta úılerde jylý qosylyp turǵannan, aýa qurǵap ketedi. Sondyqtan bólme ishin jeldetip, aýa almastyryp otyrý shart. Bul qatarda balany qys mezgilinde de taza aýada serýendetýdiń mańyzy zor. Tek myna kıindirý tártibin este saqtańyz. Qys mezgilinde balańyz tońyp qalmaýy úshin nemese kerisinshe terlep ketpeýi úshin ózińizden bir kıimge artyq kıindirińiz. Sol kezde balaǵa qolaıly temperatýra bolmaq»,- dedi dáriger.
Dárigerden ekpeden esi ketip qorqýdyń qanshalyqty durys ekenin de jaýap berdi. Tumaýǵa qarsy ekpe alý shart pa?
«Kez kelgen ekpe profılaktıkalyq maqsatta, ıaǵnı aýrýdyń aldyn alý úshin egiledi. Biraq ekpe alǵan bala múldem aýyrmaıdy degen sóz emes. Ekpe alǵan bala da aýyrady biraq ekpe almaǵan balaǵa qaraǵanda aýrý prosesi jeńil ótýi múmkin. Eń bastysy, ekpeni balany jan-jaqty tekseristen ótkizip, densaýlyq jaǵdaıynyń durystyǵyna 100 paıyz kóz jetkizip salǵan durys», - deıdi ol.