Jyl saıyn álemde sáýirdiń sońynda Dúnıejúzilik ımmýndaý aptalyǵy ótedi. Elimizde 24-30 sáýir aralyǵynda ótip jatqan atalmysh aptalyqtyń bıylǵy urany: «Bárimiz uzaq ómir súreıik!». Osy oraıda megapolıstegi Kardıologıa jáne ishki aýrýlar ǴZI Respýblıkalyq alergologıa ortalyǵynyń basshysy, QR Densaýlyq saqtaý mınıstrliginiń shtattan tys bas alergolog-ımmýnology Araı Batyrbaeva vaksınasıanyń aýrýlardyń aldyn alýda jáne ómirimizdi qorǵaýdaǵy róli týraly aıtyp berdi.
- Vaksınasıa – adam aýrý qozdyrǵyshtarymen baılanysqa túskenge deıin aýrýdan qorǵaýdyń qarapaıym, qaýipsiz jáne tıimdi ádisi. Ol birqatar juqpaly aýrýlarǵa tózimdilikti qalyptastyrý úshin organızmniń tabıǵı qorǵanys mehanızmderin qoldanady jáne ımýndyq júıeni kúsheıtedi.
- Vaksınalar ımýndyq júıeni arnaıy antıdeneler shyǵarýǵa úıretedi. Olardyń quramynda belgili bir aýrýdyń qozdyrǵyshtarynyń – onyń asqyný qaýpin týdyrmaıtyn vırýstardyń nemese bakterıalardyń tek álsiregen túrleri bar. Olar ómir boıy qorǵaıdy.
- Vaksınalar aýrýdyń qozdyrǵyshyna qarsy ımýnıtetti qalyptastyrý úshin tabıǵı qorǵanys mehanızmderin belsendi etý arqyly aýrý qaýpin azaıtady.
- Vaksınasıa aǵzanyń ımýndyq reaksıasyn týdyrady.
Dárigerdiń aıtýynsha, qazirgi zamanda juqpaly aýrýlar shekaradan ońaı ótip, ony ımýnıteti joq kez kelgen adam juqtyryp alýy múmkin. Vaksınasıa ózińizdi jáne aınalańyzdaǵy jandardy qorǵaýǵa múmkindik beredi. Kez kelgen adam ekpe saldyra alady. Biraq belgili bir aýrýlary bar adamdarǵa keıbir ekpelerdi salýǵa bolmaıdy nemese keıinirek saldyrýyna bolady. Bul aýrýlarǵa: sozylmaly aýrýlar nemese emdeý kýrstary (mysaly, hımıoterapıa); vaksına komponentterine alergıalyq reaksıalar; vaksınasıa kezindegi aýyr aýrýlar jatady.
Ekpeler birqatar keselden qorǵaıdy, sonyń ishinde: jatyr moıny obyry, V gepatıti, tumaý, qyzylsha, menıngıt, kókjótel, pnevmonıa, polıomıelıt, qutyrý, jelsheshek jáne t.b. DDU baǵalaýy boıynsha, tek balalarǵa arnalǵan vaksınalar jyl saıyn 4 mıllıonnan astam adamnyń ómirin saqtaıdy.
Lısenzıalanǵan barlyq ekpe qaýipsiz jáne olardyń bári muqıat zertteý, tekserýden ótken. Vaksına sizdi jáne jaqyndaryńyzdy ınfeksıalardan qorǵaıdy.