«Batyr Bolamyn» qorynyń qoldaýymen Almaty oblysynyń Asqar Toqpanov aýylynda balalarǵa arnalǵan sport kesheniniń ashylý saltanaty ótti.
«Qazaqstan halqyna» qorynyń demeýshiligi jáne seriktestigimen jumys istep jatqan qor shalǵaı aımaqta osymen 40-tan asa sport zaldaryn ashyp úlgergen, dep habarlaıdy almaty-akshamy.kz stan.kz-ke silteme jasap.
«Batyr Bolamyn» qorynyń qoldaýynyń arqasynda aýyl-aımaqtaǵy kóp balaly otbasylar men halyqtyń áleýmettik osal toptarynan shyqqan balalar boks, qazaqsha kúres, basketbol, dzúdo, úlken tenıs, ústel tenısi, toǵyzqumalaq, shahmat jáne t. b. sport seksıalaryna tegin qatysa alady.
Qor bul joly erkin kúresten álem chempıonatynyń birneshe dúrkin jáne Azıa chempıonatynyń jeti dúrkin júldegeri, qazaqstandyq palýan Dáýlet Nıazbekovtyń bastamasyna qoldaý bildirdi. Atap aıtqanda palýan búginde shákirt daıyndaýǵa nıettenip Asqar Toqpanov aýylynda «Niyazbeov kures zaly» sport zalyn ashqan edi. «Batyr Bolamyn» qory óz tarapynan kerekti jabdyqtarmen, sporttyq saımandarmen qamtamasyz etip, aýyl balalaryna sportpen emin-erkin aınalysýyna múmkindik jasady.
«Búgingi sport zaldyń ashylýyna kelgen barshaǵa kóp rahmet. Ásirese bul keshenge demeýshilik bildirip kóptegen quraldarmen jabdyqtaǵan «Qazaqstan halqyna» jáne «Batyr Bolamyn» qorlaryna erekshe alǵys aıtqym keledi. Endi aldaǵy ýaqytta jaqsy shákirtter daıyndap, úlken jetistikterge jetemiz dep oılaımyn», – dedi Dáýlet Nıazbekov.
Nıazbekov qazir sport seksıalaryna 100-den asa balanyń qatysatynyn alǵa tartty. Olar túrli sport túrlerine arnaıy kestemen kezekpen jattyǵýǵa keledi eken.
«Batyr Bolamyn» qory bul sport zaldy boks qolǵaptary, gerler, dop, sekirtpe, arqan, sıaqty taǵy da basqa kóptegen jattyǵý arnalǵan qural-saımandarmen jabdyqtady. Qordy Arman men Asyl Ýahap esimdi azamattar qurǵan. Olar sport zaldyń ashylý saltanatyn joǵary deńgeıde uıymdastyryp, Toqpanov aýylynyń turǵyndaryna qýanysh syılady.
Al «Batyr Bolamyn» qorynyń prezıdenti Ernur Sábikenuly barshany quttyqtap, bıyl ózge de aımaqtarda talantty jastardy qoldaýǵa arnalǵan taǵy 100 sport zalyn ashý josparǵa qoıylǵanyn alǵa tartty.
«Bul biz úshin dúbirli toı. Myna zaldyń ashylýyna sep bolyp, basy-qasynda júrip, qol ushyn tıgizip jatqanymyzǵa óte qýanyshtymyz. Osy zaldy ashyp jatqan Dáýlet eldiń, ulttyń maqtanyshy. Keshe ǵana elimizge jeńis ákelse, qazir sol jeńisin balalarmen birge jalǵastyrmaqshy. Rasynda osyndaı azamatty tárbıelegen ata-anasyna alǵys aıtamyz. Mundaı jattyqtyrýshymen bizdiń elde áli de chempıonar shyǵatynyna senimdimiz. Bul zal birinshi Dáýlettiń eńbegi. Al qoldaýshy retinde osyndaı azamattyń bastamasyn jalǵastyra alsaq nur ústine nur bolady dep oılaımyn. Osy tusta shalǵaı jerlerlerde balalardyń sportpen erkin aınalysýyna qoldaý kórsetip jatqan Qazaqstan halqyna qoryna da alǵys aıtamyn. Yntaly jastardy qoldaý biz úshin de úlken qýanysh. Aldaǵy ýaqytta bıylǵa josparlanǵan áli 76 zalymyz bar. Onyń ekeýi mine ashylyp jatyr. Oǵan deıin ashylǵan 40 zalymyz bar. Sonda barlyǵy 100-den asa zal bolmaq. Osynaı qarqynda erteńgi chempıondarymyz kóp bolsyn», – dedi Ernur Sábikenuly.
Zaldyń ashylý saltanatyna qyzmet etý merziminde 70-ke jýyq qaıyrymdylyq baǵdarlamalar men jobalardyń bastamashysy bolǵan «Qazaqstan halqyna» qorynyń ókilderi de qatysty.
«Osyndaı zaldyń ashylýyna septigi tıip jatqan «Batyr Bolamyn» qoryna alǵys aıtamyz. Aýyl turǵyndaryna da rahmet. 2024 jyldyń sońyna deıin taǵy josparlanǵan barlyq zaldardy ashyp, 100 keshendi iske qossaq deımiz. Osyndaı iske atsalysyp, balalardy tárbıelep, elimizdiń atyn shyǵaratyn sportshylar daıyndaýǵa úles qosqanymyzǵa óte qýanyshtymyz. Qorymyz ár túrli baǵyttarda jumys jasap jatyr. Qazirgi ýaqytta sý tasqynyna baılanysty 10 mıllıard teńge aqsha bólinedi. Eldegi tabıǵı apat saldaryn jeńýge de bar kúshimizdi salýdamyz. Al búgingi osy bir qýanyshty jıynda aıtarym, sport zaldarymyz kóbirek ashylyp, jeńimpazdarymyzdyń sany artsyn!», – dedi «Qazaqstan halqyna» qorynyń ókili Ulanbek Nurmanov.
Ataýly sharada Dáýletbekov Azamat, Nurlan Bekjanov, Qaıpanov Nurqoja, Álisher Erǵalı, Jadyraev Demeý, Úserbaev Ǵalym sekildi QR eńbek sińirgen sport sheberleri, olımpıada lısenzıasynyń ıegerleri keldi. Olardy aýyl balalary qýana qarsy alyp, shabyttana tústi.
Sharada qadirli qonaq retinde halyqaralyq sport sheberi, Sıdneı Olımpıadasynyń jeńimpazy, QR bokstan Eńbek sińirgen jattyqtyrýshysy Ermahan Ybraımov ta boı kórsetti.
«Qurmetti jınalǵan qaýym, búgin Dáýlet Nıazbekovtyń aıtýly sport zaly ashylyp jatyr eken. Mundaı zaldar kóptep salynýy kerek. Ony qolǵa alyp, qoldaý men demeý bildirip jatqan «Qazaqstan halqyna», «Batyr Bolamyn» qorlaryna alǵys aıtamyz! Búkil Qazaqstanda ashylyp, jatyr. Shyn júrekten sezip turmyn. Osy ashylyp jatqan zaldan bálkim 8-10 jyldan keıin bolar, áıteýir bir olımpıada chempıony shyǵady. Bul jerde Dáýlet Nıazbekovtyń ózi qalaı kúreskenin biz óte jaqsy bilemiz. Ol óziniń sheberligin kishkentaı balalarǵa beredi. Sondyqtan mindetti túrde chempıon shyǵady. Sol kezde munda taǵy da osyndaı úlken toı jasalatynyna kámil senemin. Mundaı sport zalynyń arqasynda bolashaq jetkinshekterimizdiń deni saý, myqty, azamat bolyp tárbıelenedi. Qutty bolsyn! Bárimiz sport zaldyń ósip-órkendeýine úles qosaıyq», – dedi Ermahan Ybraıymov.
Osydan soń zaldyń ashylý saltanatynda Ermahan Ybraımov pen QR Eńbek sińirgen sport sheberi Islam Baıramýkov lenta qıdy. Rásimde Asqar Toqpanov aýylynyń aqsaqaly batasyn berip, shashý shashyldy. Sport zaldyń bas jattyqtyrýshysy Dáýlet Nıazov kelgen qonaqtarǵa shapan japty.
Turǵyndar aýyl balalary úshin taptyrmas múmkindik syılaǵan "Batyr Bolamyn" qory men demeýshilerge alǵystaryn jaýdyrdy. Sharaǵa "Batyr Bolamyn" qorynyń ambassadory bolyp NNN laqap atymen tanymal, bloger Nurdaýlet Bektursyn da boı kórsetti.
“Mundaı bastamalardy qoldaımyn. Sebebi kez kelgen chempıon, kez kelgen batyr aýyldan shyǵady. Ózim de aýyldan shyqqanmyn. Sondyqtan osyndaı jerlerde esh oılanbaı qoldaýǵa árdaıym daıynbyz. Batyrlarymyz kóp bolsyn. Múmkin emes eshteńe joq!”, – dedi Nurdaýlet.
Bloger de qur qol kelmeı balalarǵa óziniń kishigirim syılyqtaryn berdi.
Osylaısha Toqpanov aýylynyń balalary jańa, keń ári ishinde barlyq múmkindik jasalǵan zalmen qosa ózderi úlgi tutqan sportshylardy kórip odan saıyn qýana tústi.
"Batyr Bolamyn" qory alda taǵy da basqa el aımaqtaryna baryp, jas talanttarǵa qoldaý kórsetpek.