Koronavırýsqa qarsy vaksına adamdy aýrýdan tolyqtaı qorǵaı almaıdy, biraq dertti jeńildetedi. Bul týraly Almaty qalasynyń joǵary sanatty dárigeri, Qoǵamdyq densaýlyq saqtaý magıstri Natalá Rahalskaıa aıtty, dep habarlaıdy almaty-akshamy.kz
Natalá Nıkolaevnanyń aıtýynsha, erte vaksınalanǵandarda aýrý áldeqaıda jeńil ótýde. Mundaı adamdardyń ımýndyq júıesi tez saýyǵady.
«Bizde bul ınfeksıaǵa qarsy vaksınanyń tıimdiligi men qaýipsizdigi týraly ǵylymı jáne klınıkalyq derekter jetkilikti. Bul - aýrýdyń negizgi aspektileri. Aýyrǵan jáne vaksınanyń tolyq kýrsynan ótken adamdar KVI-ge qarsy eń jaqsy ımýndyq qorǵanysqa ıe ekendigi týraly qazirdiń ózinde kóp jazylǵan. Qaıta aýrýǵa shaldyǵý qaýpi, ásirese, 60 jastan asqan adamdarda bar, sondaı-aq ımýndyq júıeni álsiretýshi qatar júretin aýrýlary bar adamdar úshin óte mańyzdy»,-dep jalǵastyrdy N. Rahalskaıa.
Vaksınanyń ózi ımýnıtetti tómendetpeıdi, kerisinshe, ony yntalandyrady. Vaksınalanbaǵan ári dert juqtyrǵandardyń COVID-19-ǵa qarsy ekpe alǵandarǵa qaraǵanda halderi aýyr bolady. N. Rahalskaıanyń aıtýynsha, koronavırýsqa qarsy vaksına alǵandardyń dertke qarsylyǵy 98-99%-dy quraıdy.
Vaksınalardyń paıdasy týraly aıta kele, dáriger shamamen 40-50 jyl buryn búkil álemde órship turǵan qyzylsha, polıomıelıt, dıfterıa, kókjótel jáne basqalary sıaqty ınfeksıalardy ekpeniń joıǵanyn aıtty.
«Qazirgi ýaqytta jaqsy úılestirilgen profılaktıkalyq, epıdemıaǵa qarsy sharalardyń jáne balalar men eresek turǵyndardy ımmýndaýdyń arqasynda adamdar úshin qolaıly epıdemıalyq ahýal qalyptasty. Ókinishke oraı, adamdar juqpaly aýrýlardyń qaýpin tez umytady, sondyqtan búgingi kúni vaksınalarǵa kúmánmen qaraıdy», - deıdi N. Rahalskaıa.
Almatylyq dáriger koronavırýsqa qarsy vaksına alýǵa shaqyrdy, óıtkeni dertti toqtatýdyń tıimdi joly – ekpe saldyrý.
Eske salsaq, búginde qalada 771 myńnan astam adam 1-shi komponentpen vaksınalandy. Jalpy, 60 jastan asqan adamdardyń jalpy sanynan 104 myńnan astamy egildi.
Qalada medısınalyq uıymdarda, mektepterde, mádenı-sporttyq nysandarda, bazarlar men SOSO-da 160 ekpe pýnkti bar. 1028 adamnan turatyn 237 ekpe brıgadasy jumyldyryldy.