Kólik mınıstriniń m.a. Sátjan Ablalıev Úkimettegi azamattardy qabyldaý ortalyǵynda el turǵyndaryn jeke máseleleri boıynsha qabyldady.
Kólik mınıstrligi basshylyǵynyń ókilimen kezdesýge Almaty, Pavlodar, Oral, Rıdder qalalary men Almaty oblysynyń 5 turǵyny jazyldy, dep habarlaıdy Almaty-akshamy.kz Kólik mınıstrligine silteme jasap.
M.Shaǵambaev Pavlodar oblysyndaǵy kóliktik baqylaý ınspeksıasy qyzmetkerleriniń is-áreketterine shaǵymdandy. Al S.Bekbaýov Almaty-1 jáne Almaty-2 vokzaldarynda múmkindigi shekteýli jandardyń muqtajdyqtary úshin jaǵdaı jasalmaǵandyǵyna nazar aýdardy. Óz kezeginde kópbalaly ana J.Jańabaeva Almaty oblysynyń Jambyl aýdanynda jergilikti jáne respýblıkalyq joldardy damytý máselelerin talqylaý úshin jazyldy.
Sondaı-aq mınıstrlik ókiline «Óskemen qalalyq avtobýs» JSHS-niń atynan D.Fomın júgindi. Ol halyqaralyq turaqty jolaýshylar tasymaly kezinde jolaýshylardy tasymaldaýdyń belgilengen erejelerdegi buzýshylyqtary týraly málimdedi.
Ótinish berýshilerge tolyqqandy jaýaptar qaıtarylyp, túsiniktemeler berildi.
Máselen, temirjol vokzaldaryna qatysty ótinish berýshige 2019 jyldan bastap Almaty-1 jáne Almaty-2 stansıalarynda halyqtyń mobıldiligi tómen toptary úshin jaǵdaı jasalǵany týraly aıtyldy. Almaty-1 vokzalynda kondısıoneri bar demalys bólmesi ashylǵan, sonymen birge kómekke shaqyrý túımeshekteri, №1 bılet kasasynyń janynda jáne kasa zaly men kútý zaly arasynda arnaıy kótergishter ornatylǵany sóz boldy. Ǵımaratta jáne irgeles aýmaqta múmkindigi shekteýli jandarǵa arnalǵan joldar tóselip, múgedekterge arnalǵan arbalar satyp alynǵan. Sonymen qatar sanıtarlyq toraptarǵa jóndeý júrgizilip, «Aral» platformasyna atalǵan sanattaǵy azamattardy qaýipsiz jetkizý úshin 2 jańa lıft ornatylǵany aıtyldy.
Óz kezeginde Almaty-2 vokzalynda da demalys bólmesi jóndelip, kómekke shaqyrý túımeshekteri men 3 pandýs ornatylǵan. Sondaı-aq bılet kasasynyń qoljetimdiligi kózdelip, ǵımaratta jáne irgeles aýmaqta arnaıy jabdyqtalǵan joldar tóselgen. Oǵan qosa, sanıtarlyq toraptar jóndelip, múgedekter arbalary satyp alynǵan jáne mobıldiligi tómen azamattardy vagondarǵa qaýipsiz otyrǵyzý jáne odan túsirý úshin arnaıy kótergishter de qarastyrylǵan.
№51/52 jolaýshylar poıyzyna qatysty júgingen azamatqa, tasymaldanatyn jolaýshylardyń kóp bolmaýyna baılanysty atalǵan baǵyt shyǵyndy bolǵandyǵy aıtyldy. 2023 jyly komersıalyq tasymaldaýshynyń shyǵyny 990 mln teńgege jetken. Ekonomıkalyq tıimsizdikti eskere otyryp, atalǵan baǵyt boıynsha poıyz qozǵalysy toqtatylǵan.
Alaıda, halyqty temirjol tasymalymen qamtamasyz etý úshin búgingi tańda №27/28 «Almaty-Oral» (Talgo), №7/8 «Almaty-Saratov» jáne №57/58 «Astana-Oral» jedel poıyzdary qarastyrylǵan. Jolaýshylar aǵyny ulǵaıǵan jaǵdaıda negizgi quramǵa qosymsha vagondar qosylady.
Kópbalaly áıelder sanatyndaǵy azamatshaǵa «Uzynaǵash-Otar» jolynyń 101-143 km ýchaskesi boıynsha 18 qańtarda kelisimshartqa qol qoıyldy degen jaýap berildi. Merdiger KLV Insaat Anonim Sirketi karerlerdi rásimdeý prosedýrasyna kirisken. Barlyq ruqsat qujaty alynǵannan keıin kompanıa ýchaskede tolyq aýqymdy qurylys-montaj jumystaryn bastaıdy dep kózdelip otyr. Sonymen qatar jolshylar kadrlyq jáne tehnıkalyq resýrstardy jumyldyra bastaǵan.
Jyldyń sońyna deıin eki baǵytta da jabynnyń tómengi qabaty boıynsha qozǵalysty ashý jáne jasandy qurylystar boıynsha barlyq montajdaý jumysyn aıaqtaý josparda bar.
Avtobýs parkiniń ókiline qazirgi ýaqytta onyń ótinishi boıynsha Reseı Federasıasynyń Kólik mınıstrligine qosymsha suranys jiberilgeni týraly aıtyldy. Bul rette ótinishti qaraý merzimi taǵy 30 kúnge qaıta uzartylǵan. Atalǵan másele Reseı tarapynan alynǵan aqparattyń qorytyndysy boıynsha qaralatyn bolady.