Búgin «AMANAT» partıasynyń Ortalyq apparatynda «AMANAT» partıasy janyndaǵy jastardy qoldaý jónindegi respýblıkalyq keńestiń otyrysy ótti.
Keńeste «Bolashaq» halyqaralyq stıpendıasyn damytý strategıasy men aldaǵy ınovasıalar talqylandy, dep habarlaıdy Almaty-akshamy.kz.
Otyrysqa Parlament Májilisiniń depýtattary, Ǵylym jáne joǵary bilim vıse-mınıstri D.Sheglova, Eńbek jáne halyqty áleýmettik qorǵaý birinshi vıse-mınıstri A.Sarbasov, «Halyqaralyq baǵdarlamalar ortalyǵy» AQ Basqarma tóraǵasy Á.Ospanova, memlekettik organdardyń ókilderi, «Bolashaq» baǵdarlamasynyń túlekteri, keńes jáne jastar uıymdarynyń músheleri, jýrnalıser jáne t. b. qatysty.
Otyrysty asha otyryp, keńes tóraǵasy, depýtat Nartaı Sársenǵalıev «Bolashaq» stıpendıasyn damytýdyń 2024-2026 jyldarǵa arnalǵan jańa strategıasyn eskere otyryp, birqatar ózgerister bolatynyn atap ótti. Inovasıalar stıpendıanyń tıimdiligin jáne qujattardy qabyldaý men konkýrstyq irikteýdiń ashyqtyǵyn arttyrýǵa baǵyttalatyn bolady.
QR Ǵylym jáne joǵary bilim vıse-mınıstri Dınara Sheglova Strategıanyń jańa tarmaqtary boıynsha birqatar túsiniktemeler berdi. Salalyq jáne óńirlik suranystardy, qysqa merzimdi jáne uzaq merzimdi strategıalar men damý josparlaryn eskere otyryp, basym mamandyqtar tizimin qalyptastyrý boıynsha jumys aıaqtaldy, tizim bekitilýde. Sondaı-aq, uıymdar men kásiporyndardyń suranystary boıynsha toptyq taǵylymdamalardy engizý, postdoktorantýrany iske qosý, aýyldyq kvotalardy ulǵaıtý múmkindigi qarastyrylýda, stıpendıadan aıyrylǵan tulǵalardan qarajatty qaıtarý boıynsha júıeli jumys quryldy, aı saıyn memlekettik búdjetke shamamen 160 mln teńge qaıtarylady.
«Halyqaralyq baǵdarlamalar ortalyǵynyń» Basqarma tóraǵasy Álıa Ospanova ortalyqtyń atqarylyp jatqan jumystary týraly habarlady. Qujattardy qabyldaý jyl boıy júrgiziledi jáne sáýir aıynyń sońynda bastalady, avtomattandyrý kontekstinde konkýrstyq irikteý prosesi qaıta qaralady, jergilikti atqarýshy organdarmen ǵylymı zertteý taqyryby boıynsha ótinimdi qalyptastyrý jáne óńirlerdiń problemalaryn tıimdi sheshý jáne keıinnen jumysqa ornalastyrý úshin bilim alýshy stıpendıattardyń kýratorlyǵyn uıymdastyrý máselesi pysyqtalady. Stıpendıattardan túsken suranystardy eskere otyryp, jaýapty memlekettik organdarmen birge 2012 jyldan beri ózgermegen stıpendıa mólsheri men shyǵystar normalaryn qaıta qaraý talqylanady.
«Qysqa merzim ishinde biz taǵylymdamadan ótý sharttaryn jasasý prosesin sıfrlandyrdyq. 1-16 aqpan aralyǵynda TrustMe platformasynda 346 onlaın kelisim-shart jasaldy, bul stıpendıattar jumsaıtyn resýrstardy aıtarlyqtaı qysqartty. «500 ǵalym» ǵylymı taǵylymdamalar boıynsha qujattardy qabyldaýdy avtomattandyrý, SİM jáne elshiliktermen birlesip kepildik hattardy sıfrlandyrý, úmitkerlermen jáne stıpendıattarmen ózara is-qımyl jasaý úshin onlaın - platforma men mobıldi qosymsha ázirleý josparlanýda», - dep atap ótti Á.Ospanova.
Kezdesý sońynda qatysýshylar «Bolashaq» stıpendıasyna odan ári ózgerister engizýdi talqylaý úshin breınstormıng ótkizýge kelisti.