Elimizdiń áıelder quramasy Azıa chempıonatynda kúmis medal jeńip aldy
Djakartada ótip jatqan nysana kózdeýden Azıa chempıonatynda Qazaqstan áıelder quramasy vıntovkamen 50 metrden 3 pozısıada nysana kózdeýde kúmis júldeger atandy, dep habarlaıdy almaty-akshamy.kz
Komandalyq synda Aleksandra Le, Elızaveta Bezrýkova men Arına Altýhova baq synady. Olardyń nátıjesi 1754 upaı. Úndistan quramasy (1760 bal) top jarsa, úzdik úshtikti Ońtústik Koreıa túıindedi.
Osy baǵdarlamada qazaqstandyq mergender arasynda eń kóp upaı jınaǵan (589 upaı) Aleksandra 7-orynǵa turaqtap, Ulttyq quramaǵa Parıj oıyndarynyń joldamasyn syılady. Sondaı-aq Nıkıta Chırúkın jyldam oq atatyn tapanshamen 25 metrden nysana kózdeýde Olımpıada lısenzıasyna ıe boldy.
Qazir Ulttyq qurama enshisinde 5 joldama boldy. Olardy Islam Satpaev, Arına Altýhova, Konstantın Malınovskıı, Aleksandra Le men Nıkıta Chırúkın jeńip aldy.
Indonezıa astanasyndaǵy Azıa chempıonaty 18 qańtarda aıaqtalady.