Almatyda qoǵamdyq kólik júrgizýshileri men jolaýshylary úshin qaýipsizdik sharalary talqylandy
Talqylaý jolaýshylar tasymalymen aınalysatyn kólik kásiporyndarynyń birinde ótken jıyn aıasynda boldy. Onda úshinshi adamdardyń zańsyz áreketterinen júrgizýshiler men jolaýshylardyń qaýipsizdigin arttyrý boıynsha óńirlik sharalar ázirlendi.
– 11-15 qańtar aralyǵynda respýblıka aýmaǵynda jergilikti atqarýshy organdarmen, kólik mınıstrligi kólik komıtetiniń aýmaqtyq bólimshelerimen jáne jurtshylyq ókilderimen birlese otyryp, «Tasymaldaýshy» jedel-profılaktıkalyq is-sharasy ótip jatyr. Basty maqsat – qoǵamdyq kóliktegi kez kelgen quqyq buzýshylyqqa “múldem tózbeýshilik” jáne júrgizýshiler men jolaýshylardyń qaýipsizdigin qamtamasyz etý, – dedi Almaty qalalyq PD ákimshilik polısıa basqarmasy bastyǵynyń orynbasary Bolatbek Baıatanov.
Polısıada qoǵamdyq kólik salonyn “102” arnasyna shyǵatyn dabyl túımelerimen jáne kólik uıymynyń dıspecherlik qyzmetimen jabdyqtaý, revızıa júrgizý jáne avtobýstardy beıne jáne dybys jazý fýnksıalary bar baqylaý kameralarymen jańartý máselelerin qarastyrýdy, sondaı-aq kólik uıymynyń dıspecherlik qyzmeti, kólik júrgizýshilerine tótenshe jaǵdaılar jáne qaýipsizdikke qaýip tóngen jaǵdaıda kólikti tolyǵymen toqtatý sharalaryn qabyldaýdy jáne “102” arnasy arqyly dereý polısıaǵa habarlaýdy usynady.