Táýelsizdik kúni №87 orta mektep oqýshylary «Jas ulan» men «Jas qyran» qataryna qosyldy. Mektep ujymy 1-synyptyń 215 oqýshysynyń antyn qabyldap, Qazaqstandaǵy barsha mektep oqýshylarynyń basyn biriktiretin «Jas ulan» jáne «Jas qyran» uıymynyń sımvolıkasyn taqty.
Bul - «jasqyrandyqtardyń» pandemıa aıaqtalǵannan keıingi alǵashqy saltanatty jıyny. Uıym óskeleń urpaqty joǵary adamgershilik-rýhanı qundylyqtar, toleranttylyq, demokratıalyq jáne ózara túsinistik mádenıeti qaǵıdattary negizinde otansúıgishtikke tárbıeleıdi.
«Uıym Qazaqstan halqynyń tarıhyn, mádenıetin, tilin bilý negizinde rýhanı áleýetti qalyptastyrýmen, oqýshylardyń qoǵamdyq belsendiligin, tanymdyq belsendiligin arttyrýmen, balalardyń shyǵarmashylyǵy men áleýmettik bastamalaryn damytýmen aınalysady. Mektep ómirindegi eresekter men balalar arasyndaǵy qarym-qatynasty úılestirýge jaýapty. Sondaı-aq, balalar men jasóspirimder uıymdary memlekettik jáne qoǵamdyq qurylymdarmen, ÚEU-men áleýmettik áriptestikte alǵashqy qadamdar jasap jatyr», – deıdi №87 orta mektep dırektory Ular Myltyqbaeva.
Uıym qyzmetiniń qorytyndysy jyl saıyn shyǵarylady, mekteptiń úzdik "jasulandyqtary" jalpymekteptik, oblystyq, respýblıkalyq «Jas ulan» keńesine múshe bola alady. Oqý jylynyń sońynda úzdik birlestikke «Úzdik top» ataǵy men dıplomy, sonymen qatar Qazaqstannyń tarıhı jerlerine saıahat nemese jazǵy saýyqtyrý lagerine joldama beriledi. Oqýda jáne qoǵamdyq jumystarda erekshe jetistikterge jetken mektep oqýshylary «Jas ulan» altyn kitabyna enedi. Eń belsendiler kórnekti qoǵam jáne saıası qaıratkerlermen kezdesýge, trenıńterge, semınarlarǵa jáne eldegi eń jaqsy lagerlerde kóshbasshylyq sabaqtarǵa qatysýǵa múmkindik alady.
Osy oraıda aıta keteıik, «Jas ulan» jáne «Jas qyran» biryńǵaı balalar men jasóspirimder uıymy» respýblıkalyq qoǵamdyq birlestigi 2011 jyly qurylǵan.