Almatyda «Halyq qatysatyn búdjet» jobasy aıasynda turǵyndardyń úzdik usynystary úshin daýys berý bastaldy
Aǵymdaǵy jyldyń 2 mamyrynan bastap «Halyq qatysatyn búdjet» jobasy aıasynda Almaty aýdandaryn abattandyrý jáne damytý boıynsha úzdik usynystarǵa daýys berý bastalady, dep habarlaıdy Almaty-akshamy.kz.
Aǵymdaǵy jyldyń 14 mamyryna deıin Almatyda turaqty tirkeýi bar qala turǵyndary unaıtyn úsh joba úshin portal budget.open-almaty.kz arqyly óz daýystaryn bere alady. Daýys berýge qatysý úshin tirkeý/avtorızasıa talap etilmeıdi, jobalardy tańdaýdy ESQ nemese SMS-kod kelip túsetin telefon nómiri arqyly rastaýǵa bolady.
Almaty turǵyndarynan usynystardy qabyldaý kezeńinde 897 túrli ótinim tústi. Jobanyń eń belsendi qatysýshylary – Áýezov aýdanynyń turǵyndary (162), odan keıin Naýryzbaı (126) jáne Jetisý (120) aýdandary.
Ótinimderdi qaraý barysynda aýdan ákimdikteri janynan «Halyq qatysatyn búdjet» aıasynda qurylǵan saraptamalyq keńestermen daýys berýge 373 ótinim jiberildi. Kelip túsken usynystardyń kópshiligi myna salalaryǵa qatysty:
- balalar jáne sport alańdaryn salýǵa/jóndeýge 163 (43,7%),
- jalpyǵa ortaq paıdalanylatyn demalys oryndaryn (besedkalar, oryndyqtar, ýrnalar, balalar oıyndaryna arnalǵan jabdyqtar men konstrýksıalar) salý/jóndeý 71 (19%);
- jalpy paıdalaný oryndaryn jaryqtandyrý (saıabaqtar, skverler, jaıaý júrginshiler aımaqtary, kósheler jáne ózge de obektiler) 51 (13,7%).
Eń kóp daýys jınaǵan jobalardy (50-den kem emes) aýdan ákimdikteri aǵymdaǵy jyly iske asyratyn bolady.
Eske salsaq, 2023 jyly «Halyq qatysatyn búdjet» jobasyn qarjylandyrýǵa qosymsha bólingen soma 7 mlrd teńgeni quraıdy. Bir jobalyq usynystyń eń joǵary quny 86,2 mln teńgeden (25 myń AEK) aspaýǵa tıis. Osy jobalardyń jıyntyq quny árbir aýdan úshin «Halyq qatysatyn búdjet» lımıtinen (875 mln teńge) aspaýy tıis.
Daýys berý qorytyndylary budget.open-almaty.kz portalynda jarıalanady. 2023 jylǵy 16 mamyrǵa deıin «Jobalar boıynsha materıaldar» bóliminde.
«Halyq qatysatyn búdjet» boıynsha konsýltasıany Almaty qalasynyń aýdandyq ákimdikterinen, sondaı-aq Almaty ákimdiginiń Open Almaty qoǵamdyq qabyldaý bólmesinen + 7 (727) 224 39 29 (ishki. 203), 1308 alýǵa bolady
Anyqtama:
«Halyq qatysatyn búdjet» jobasy Almatyda 2019 jyldyń tamyz aıynda iske qosyldy. Sol jyly Almaty turǵyndarynan 333 usynys kelip tústi, onyń 49-y iske asyrýǵa maquldandy; 2020 jyly – 795 (iske asyrýǵa – 256), 2021 jyly – 934 (iske asyrýǵa – 236) jáne 2022 jyly 1251 usynys tústi (iske asyrýǵa – 205) joba júzege asty.