Aqmola oblysy Shýchınsk qalasyndaǵy Qorǵanys mınıstrliginiń Shoqan Ýálıhanov atyndaǵy áskerı kolejiniń bazasynda «Qarýly kúshterdiń úzdik serjanty» ataǵyna arnalǵan XIII búkil armıalyq konkýrs sheńberindegi serjanttar saıysy ótti. Oǵan júzden astam áskerı qyzmetshiden turatyn 16 komanda qatysty, dep habarlaıdy almaty-akshamy.kz.
QR Qarýly kúshteriniń bas serjanty sheber-serjant Temirbek Halyqov bul baıqaýdyń kásibı serjanttar daıyndaıtyn oqý ornynda ótkizýdiń sımvoldyq sıpatyn atap ótti.
– Jyl saıynǵy baıqaý serjanttardyń bólimshelerdiń jaýyngerlik daıyndyǵyn qoldaýdaǵy praktıkalyq daǵdylaryn jetildirýge baǵyttalǵan. Ol oqytýdyń tıimdi ádisterin engizýge jáne serjanttar arasynda básekelestikti arttyrýǵa yqpal etedi, – dedi baıqaýdyń mindetteri jaıynda sheber serjant Temirbek Halyqov.
Baǵdarlama serjanttar men sarbazdarǵa qatysty jaýyngerlik daıyndyqtyń barlyq aspektilerin qamtydy. Teorıadan bólek, oǵan ár túrli pozısıalardan atý, túrli qashyqtyqqa júgirý, 15 kelilik júkpen
10 shaqyrymǵa júgirý, túrli kedergilerdi eńserý, dáldik pen qashyqtyqqa granata laqtyrý, beltemirge tartylý jáne qoıan-qoltyq urys tásilderi kiredi.
Jarys qorytyndysy boıynsha jalpy komandalyq esepte birinshi oryndy 32039 áskerı bólimi, ekinshi oryndy Desanttyq-shabýyldaý áskerleri, úshinshi oryndy «Batys» óńirlik qolbasshylyǵy jeńip aldy.
Kishi serjant Damır Qunanbaev (Tyl bastyǵynyń basqarmasy) úzdik bólimshe komandıri bolyp tanyldy. Ekinshi orynda – kishi serjant Rýslan Bekeshov (Desanttyq-shabýyldaý áskerleri), úshinshi orynda – kadet Beglan Temirhan (Qurlyq áskerlerine tikeleı baǵynysty bólim).
Gvardıa serjanty Muhıadın Smaǵul (Desanttyq-shabýyldaý áskerleri) úzdik vzvod serjanty sanatynda top jardy. Ekinshi oryn 3-synypty serjant Rýslan Orymbaev (32093 áskerı bólimi), úshinshi oryn serjant Sábden Dúısembektiń ("Astana" ÓńQ) enshisinde.
Baıqaý nátıjesi boıynsha aǵa serjant Amanjol Dúısenbaev (32039 áskerı bólimi) úzdik rota serjanty atandy. Ekinshi, úshinshi oryndardy 3-synypty serjant Raýan Toqtarbekov (Desanttyq-shabýyldaý áskerleri) pen aǵa serjant Nurbolat Ádilbek ("Batys" ÓńQ) ózara bólisti.
Úzdik batalón serjanty ataǵy 2-synypty serjant Abylaı Serikbaevqa ("Astana" ÓńQ) buıyrdy. Ekinshi oryn 3-synypty serjant Aıan Egizbaevtyń ("Batys" ÓńQ) enshisinde. Úshinshi oryndy 3-synypty serjant Amantaı Qozybaev (32093 áskerı bólimi) ıelendi.
Úzdik brıgada serjanty ataǵyn 2-synypty serjant Orynbek Sándibekov (32039 áskerı bólimi), 1-synypty serjant Jaslan Jamahaev ("Ońtústik" ÓńQ) jáne 1-synypty serjant Aıdos Qalymbaev ("Batys" ÓńQ) jeńip aldy.
Serjant İlás Sámetov (Desanttyq-shabýyldaý áskerleri), serjant Baqytbek Aýǵan (Qarý-jaraq bastyǵynyń basqarmasy), serjant Janserik Qolan (32093 áskerı bólimi) serjant-maman atandy.
Shtab komponenti serjanty ataǵy aǵa serjant Elaman Qurmashev ("Batys" ÓńQ), serjant Seıdahmet Asqar (Desanttyq-shabýyldaý áskerleri) jáne serjant Oljas Rashıtovtarǵa (Áýe qorǵanysy kúshterine tikeleı baǵynysty bólim) buıyrdy.
Konkýrsqa qatysýshylardyń barlyq sanattary arasynda 32039 áskerı bóliminiń otrád serjanty 2-synypty serjant Orynbek Sándibekov absolútti jeńimpaz atandy. Áskerı qyzmetshi "Ásker tarlany" konkýrsy sheńberinde Qazaqstan Respýblıkasy Qorǵanys mınıstriniń marapatyna usynyldy.
