Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý resmı saparmen Vengrıaǵa kelip, onyń sheńberinde Qazaqstan-Majarstan Strategıalyq keńesiniń 6-shy otyrysyna qatysty.
Taraptar saıası, saýda-ekonomıkalyq, ınvestısıalyq jáne mádenı-gýmanıtarlyq salalardaǵy ekijaqty qatynastardyń ózekti máselelerin talqylady, dep habarlaıdy almaty-akshamy.kz. Ulttyq múddelerdiń «túıisý núkteleri» retinde energetıka, ónerkásip, kólik jáne logıstıka, sý resýrstarynyń menedjmenti jáne ınovasıa, aýyl sharýashylyǵy, bilim berý jáne týrızm sıaqty salalar boldy.
Delegasıa basshylary saýda-ekonomıkalyq saladaǵy qazaq-majar yntymaqtastyǵy eki el arasyndaǵy strategıalyq áriptestiktiń basty qozǵaýshy kúshi ekenin atap ótti. Osyǵan baılanysty taraptar Ekonomıkalyq yntymaqtastyq jónindegi úkimetaralyq komısıanyń áleýetin tıimdi paıdalaný jáne Qazaqstan men Majarstannyń isker toptary arasyndaǵy ózara is-qımyldy jandandyrý qajettigi jóninde kelisti.
QR Syrtqy ister mınıstri Astana men Býdapesht arasyndaǵy yntymaqtastyqtyń barlyq spektrin keńeıtý boıynsha praktıkalyq qadamdardy iske asyrýdyń mańyzdylyǵyn atap ótti. «Bizdiń elderimizdiń arasynda saıası deńgeıdegi óte jaqyn jáne senimdi baılanystardyń, isker toptar arasyndaǵy jemisti yntymaqtastyqtyń, sondaı-aq mádenı jáne adamaralyq baılanystardyń arqasynda sheshilmegen máseleler joq», – dedi M.Nurtileý.
Óz kezeginde majar delegasıasynyń basshysy Majarstan Qazaqstannyń Eýropalyq Odaqtaǵy senimdi seriktesi ekenin málimdedi. «Biz sizdiń elińizdegi saıası jáne ekonomıkalyq reformalardy qoldaımyz jáne tabysty seriktestigimizdi odan ári belsendi damytýǵa daıynbyz», – dedi M.Varga.
Sondaı-aq, taraptar Majarstan Premer-mınıstri Vıktor Orbannyń Qazaqstanǵa sapary kezinde qol jetkizilgen ýaǵdalastyqtardy is júzinde iske asyrý máselelerin talqylady. Atap aıtqanda, taraptar iri birlesken jobalardy iske asyrýda, ózara saýdany ártaraptandyrý jáne ulǵaıtýda kúsh-jigerdi biriktirý ýaǵdalastyqq qol jetkizdi. Qazaqstan eksporttyq taýarlar nomenklatýrasyn somasy 700 mln AQSH dollaryna jýyq 95 ataýǵa ulǵaıtý nıetin rastady.
Qazaqstan tarapynyń statısıkasy boıynsha eki el arasyndaǵy taýar aınalymy 2022 jyly 172 mln AQSH dollaryn qurady, al aǵymdaǵy jyldyń 9 aıynda ótken jyldyń sáıkes kezeńimen salystyrǵanda 22%-ǵa ulǵaıyp, 140 mln dollardy qurdy.
Otyrys barysynda ókildi delegasıa quramyna kirgen QR beıindi mınıstrlikteriniń ókilderi de sóz sóıledi. Atom energıasyn beıbit maqsatta paıdalaný salasynda mamandar daıarlaý, sý resýrstaryn tıimdi basqarýda tájirıbe almasý, sondaı-aq saýda mısıalarynyń ózara saparlaryn uıymdastyrý máselelerinde odan ári ózara is-qımyl jasaý jóninde usynystar aıtyldy.
Strategıalyq keńes aıasynda Sý resýrstaryn basqarý boıynsha Qazaqstan-Majarstan forýmy ótti. Sarapshylar sý resýrstaryna qatysty ózekti máselelerdi sheshý boıynsha beıindi mınıstrlikterdiń birlesken is-sharalaryn ótkizýge kelisti.
Sondaı-aq, Mınıstr M.Nurtileý «Globalia» majar kompanıasynyń basshysy Gabor Shagı jáne «Astana» Halyqaralyq qarjy ortalyǵynyń (AHQO) alańynda jumys isteıtin «Equilibrium Capital» ınvestısıalyq qorynyń prezıdenti Pıter Nadpen ekijaqty kezdesýler ótkizdi.
Kompanıa basshylary Qazaqstanda jańartylatyn energıa kózderi, majar kapıtalynyń qatysýymen AHQO alańynda saýda-ınvestısıalyq ınstıtýttar qurý, IT jáne banktik konsaltıń salasyndaǵy ınvestısıalyq jobalardyń iske asyrý barysy jóninde, sondaı-aq ekonomıkalyq yntymaqtastyqty odan ári keńeıtý boıynsha josparlar týraly egjeı-tegjeıli habarlady.