Almatyda jýrnalıser arasynda din taqyrybyndaǵy eń ózekti degen materıaldarǵa baıqaý jarıalandy. Din isteri jónindegi basqarmanyń tapsyrysy boıynsha «JASTAR» damytý ortalyǵy» jastar qoǵamdyq birlestiginiń uıymdastyrýymen «Birneshe nomınasıa boıynsha din salasynyń ózekti máseleleri týraly úzdik materıaldardy daıyndaý baıqaýy» boıynsha baspasóz konferensıasy ótti. Arnaıy uıymdastyrylǵan is-sharada uıymdastyrýshylar baıqaýdyń sharttary men talaptary týraly tolyq aqparat berdi.
Besinshi jyl qatarynan ótkizilip otyrǵan mundaı baıqaýǵa Almatyda din taqyrybyn qozǵap júrgen jýrnalıser, blogerler, 18 jasqa deıingi basqa da úmitkerler qatysa alady.
Almaty qalalyq Din isteri basqarmasynyń dinı birlestiktermen jumys bóliminiń jetekshisi Baǵdáýlet Ábdihamıtovtyń aıtýynsha, baıqaýdyń negizgi maqsaty – din salasyndaǵy memlekettik saıasattyń ózekti máselelerine jurtshylyqtyń nazaryn aýdarý. Ol úshin buqaralyq aqparat quraldary men áleýmettik jeliler arqyly destrýktıvti aǵymdar ıdeologıasynyń zıany jáne din salasyndaǵy memlekettik saıasattyń mańyzdy baǵyttary týraly halyqty habardar etý mańyzdy. Sondaı-aq, bul baıqaý qatysýshylardyń shyǵarmashylyǵyn shyńdaýǵa, daryndaryn pash etýge, ózderin tanytýǵa berilgen úlken múmkindik.
«Maqalalar, posttar, áleýmettik rolıkter konkýrs taqyrybyna sáıkes bolýy tıis. Destrýktıvti dinı aǵymdar ıdeologıasynyń bedelin túsirý, radıkaldy dinı ıdeologıanyń zıandylyǵy týraly halyqty habardar etý, dinı ekstremızmge qarsy turý jáne konfesıaaralyq kelisim, qoǵamdaǵy turaqtylyq ıdeıalaryn nyǵaıtý sekildi ózekti taqyryptardyń jan-jaqty taldanýy, tereńdigi, naqty dálelerderdiń bolýy, mazmundylyǵy sekildi sharttarǵa basa nazar aýdarylady», – dep atap ótti Baqdáýlet Ábdihamıtov.
Baıqaý mynandaı nomınasıalarǵa bólinedi:
- Ǵalamtor resýrstaryndaǵy eń úzdik qazaq tilindegi maqala;
- Ǵalamtor resýrstaryndaǵy eń úzdik orys tilindegi maqala;
- Ǵalamtordaǵy jáne áleýmettik jelilerdegi eń úzdik taqyryptyq qysqa beınerolık;
- Eń belsendi bloger.
Baıqaýdyń jalpy júlde qory – 1 350 000 teńge. Sondaı-aq, aqshalaı yntalandyrý syılyqtary da bar.
Baıqaýǵa 18 jastan asqan jýrnalıser, blogerler, Almaty qalasynyń barlyq turǵyndary qatysa alady.
Baıqaýǵa qatysý úshin qatysýshylar óz jumystaryn jáne ózderi týraly aqparatty almaty.baiqau.2023@gmail.com elektrondy mekenjaıǵa osy jyldyń 1 qazanyna deıin joldaı alady. Baıqaý týraly tolyq aqparat pen ár nomınasıa boıynsha talaptardy Almaty qalasy Din isteri jónindegi basqarmanyń resmı saıty men din_almaty resmı akkaýntynda jarıalanǵan erejeden kóre alady.
Baıqaýǵa qatysýshylardy marapattaý rásimi 2023 jyldyń 20–30 qazan aralyǵynda ótedi.