2023 jylǵy «Úzdik ǵylymı qyzmetker» baıqaýynyń nátıjeleri belgili boldy.
Ǵylymı-zertteý ınstıtýttarynyń, joǵary oqý oryndarynyń jáne ǵylymı uıymdardyń 50 ǵalymy jeńimpaz atanyp, 2000 AEK kóleminde syıaqy jáne kýálik alady, dep habarlaıdy almaty-akshamy.kz.
Qazaqstan Respýblıkasynyń 2011 jylǵy 18 aqpandaǵy N 407-IV «Ǵylym týraly» zańyna sáıkes Qazaqstan Respýblıkasy Ǵylym jáne joǵary bilim mınıstrliginiń tarapynan ǵalymdardy qoldaýdyń kezekti sharasy jyl saıynǵy «Úzdik ǵylymı qyzmetker» syılyǵyn taǵaıyndaý boldy. Ol ǵylym men tehnıkanyń damýyna eleýli úles qosqan ǵalymdardy, ǵylymı qyzmetkerlerdi qoldaýǵa baǵyttalǵan.
Konkýrsqa qatysýǵa ótinimder osy konkýrs úshin arnaıy qurylǵan jáne avtomatty túrde toǵyz ólshemshart boıynsha baldary bar aqparattyq júıe arqyly qabyldandy. Bul baıqaýdyń ashyqtyǵy men transparenttiligin qamtamasyz etti. Ǵylymı jetistikterdi baǵalaý krıterııleri ǵylymı jáne saraptamalyq qaýymdastyqpen birge jasaldy. Baıqaýdyń barlyq qatysýshysy ótinim berý kezeńinde óz baldaryn kóre aldy. Olardy Respýblıkalyq konkýrstyq komısıa qarady jáne saraptamalyq toptar usynylǵan qujattardyń bekitilgen krıterıılerge sáıkestigin seksıalarda tekserdi. Komısıa men sarapshylar tobynyń quramynda jetekshi ǵalymdar, táýelsiz sarapshylar, memlekettik organdardyń ókilderi jáne Jas ǵalymdar keńesiniń músheleri jumys istedi.
Konkýrsqa qatysý úshin 7 baǵyt boıynsha barlyǵy 307 ótinim kelip tústi: «Jaratylystaný ǵylymdary», «Injınırıń jáne tehnologıalar», «Medısına jáne densaýlyq saqtaý», «Áleýmettik ǵylymdar», «Gýmanıtarlyq ǵylymdar jáne óner», «Aýyl sharýashylyǵy jáne veterınarıa ǵylymdary» jáne «Áskerı ǵylymdar jáne ulttyq qaýipsizdik».
Sarapshylar usynylǵan materıaldar men qujattardyń tańdalǵan kórsetkishterine sáıkestigin rastady nemese rastamady.
Sonymen qatar, 2021 jylǵy 2 qarashadaǵy № 544 buıryǵymen bekitilgen «Úzdik ǵylymı qyzmetker» jyl saıynǵy syılyǵyn berý Qaǵıdalaryna sáıkes ǵylym salasyndaǵy ýákiletti organ konkýrs nátıjelerin qaıta qaraý úshin apelásıalyq komısıa qurdy.
Apelásıalyq komısıanyń qaraýyna barlyǵy 62 ótinish kelip tústi. Barlyq ótinimderdi apelásıalyq komısıa músheleri «Úzdik ǵylymı qyzmetker» jyl saıynǵy syılyǵyn berýge úmitkerdiń ǵylymı jetistikterin baǵalaýdyń sapalyq jáne sandyq kórsetkishterine sáıkes alqaly túrde qarady.
Ótinishterdi qaraý nátıjeleri saralanǵan tizim túrinde resimdeldi jáne Respýblıkalyq konkýrstyq komısıanyń qorytyndy otyrysyna jiberildi.
Nátıjesinde Respýblıkalyq konkýrstyq komısıa otandyq ǵylymnyń damýyna eleýli úles qosqan 50 ǵalymǵa 2023 jylǵy «Úzdik ǵylymı qyzmetker» syılyǵyn berý týraly sheshim qabyldady.