Qazaqstanda aýyl mektepterin, muǵalimderdiń kóshbasshylyq daǵdylaryn damytý jáne qyzdar kóshbasshylyǵyn qoldaý maqsatynda mańyzdy bastamalar júzege asyrylýda. Almatyda ótken «Aýyl mektepterin transformasıalaý: Qazaqstandaǵy muǵalimderdiń kásibı qaýymdastyǵyn damytý» konferensıasynda osy máseleler keńinen talqylandy, dep habarlaıdy aqshamnews.kz
İs-shara «Aýyldyq mektep shamy» pılottyq jobasy aıasynda uıymdastyryldy. Joba aýyl mektepterin qoldaýǵa jáne muǵalimderdiń kóshbasshylyǵy arqyly kásibı qaýymdastyqtardy damytýǵa baǵyttalǵan.
«Búgin Qazaq ulttyq qyzdar pedagogıkalyq ýnıversıtetinde mańyzdy konferensıa ótip jatyr. «Aýyldyq mektep shamy» jobasy Mańǵystaý, Atyraý jáne Almaty oblystaryndaǵy aýyl mektepterinde júzege asyryldy. Jobanyń basty maqsaty – muǵalimderdiń kásibı damýyn qamtamasyz etý. Qazirgi tańda elimizde «Ómir boıy bilim alý» tujyrymdamasy iske asyrylýda. Osy aıada ýnıversıtetimizde bolashaq ustazdardy daıarlaý baǵytynda aýqymdy jobalar qolǵa alynǵan. Solardyń biri – sabaqty zertteý ádisi. Sonymen qatar mektep muǵalimderi júrgizip jatqan jobalar da bilim berý uıymdary men qoǵamdaǵy ózekti máselelerdi qamtıdy. Árbir ustaz óz damý jobasy arqyly oqý jyly boıy mektep ishinde naqty ózgerister engizýge úles qosady. Búgingi konferensıa – osy tájirıbelermen bólisip, muǵalimderdiń engizgen jańashyldyqtaryn tanystyrýǵa arnalǵan. Ýnıversıtetimiz aldaǵy ýaqytta da mektep muǵalimderiniń kásibı damýyn qoldap, osy baǵyttaǵy jumysyn jalǵastyra beredi. Bul – bizdiń basty maqsattarymyzdyń biri», – dedi QyzPU rektory Gúlmıra Qanaı
Konferensıaǵa muǵalimder, mektep dırektorlary, bilim salasyndaǵy sarapshylar, memlekettik, halyqaralyq jáne úkimettik emes uıymdardyń ókilderi qatysty. Qatysýshylar jobanyń negizgi nátıjelerin, aýyldyq bilim berýdi transformasıalaý tájirıbelerin jáne muǵalimderdiń kásibı qaýymdastyǵyn damytý perspektıvalaryn talqylady.
«Aýyl mektepterin damytýǵa baǵyttalǵan jumystar júıeli túrde júrgizilýde. Eldiń ár óńirinde túrli jobalar iske asyrylyp, aýyldyq jerlerde zamanaýı mektepter salynyp, olardyń materıaldyq-tehnıkalyq bazasy jańartylýda. Degenmen, sapaly bilim berý úshin eń aldymen pedagogterdiń biliktiligin arttyrý mańyzdy. Osy turǵyda «Aýyldyq mektep shamy» pılottyq jobasy aýyl mektepteriniń áleýetin kóterýge arnalǵan mańyzdy bastamalardyń biri. Jobanyń qorytyndy konferensıasynyń Qazaq ulttyq qyzdar pedagogıkalyq ýnıversıtetinde ótýi de erekshe mánge ıe, sebebi bul ýnıversıtet bilikti pedagogterdi daıarlaý isinde jetekshi oryn alady», – dep atap ótti QR Oqý-aǵartý mınıstrligi Orta bilim berý komıteti tóraǵasynyń orynbasary Jomart Karambaev.
«Aýyldyq mektep shamy» jobasy Almatydaǵy IýNESKO-nyń Óńirlik keńsesiniń jáne Qazaqstan Respýblıkasynyń IýNESKO jáne ISESKO isteri jónindegi Ulttyq komısıasynyń qoldaýymen júzege asyryldy. Sonymen qatar jobaǵa HertsCam kásibı qaýymdastyǵy (Kembrıdj, Ulybrıtanıa), Qazaq ulttyq qyzdar pedagogıkalyq ýnıversıteti (muǵalimderdi sertıfıkattaý jónindegi jaýapty uıym) jáne TeachersLab táýelsiz platformasy (fasılıtatorlardy qoldaý jónindegi jaýapty uıym) qatysty.
«Bul joba Qazaqstan Respýblıkasynyń IýNESKO jáne ISESKO isteri jónindegi Ulttyq komısıasynyń qarjylyq qoldaýymen óz jumysyn bastady. Jobanyń basty ereksheligi – aýyldyq mektepterde muǵalimderdiń kóshbasshylyǵyn damytý arqyly kásibı qaýymdastyqtar qurý. Iaǵnı, muǵalimder jyl boıy mektep ishinde belgili bir máseleni tańdap, kásibı orta qalyptastyryp, ony talqylap, sheshýdiń túrli joldaryn izdestirdi. Joba aıasynda túrli múmkindikter qarastyryldy. Mysaly, mektep ishinde arnaıy daıyndalǵan fasılıtatorlar bar. Olar sesıalardy uıymdastyryp, muǵalimderge kásibı máselelerin talqylaýǵa kómektesedi jáne tıimdi sheshimder tabýǵa baǵyttaıdy. Muǵalimder zertteý ádisterin qoldana otyryp, óz jobalaryn ázirlep, iske asyrdy. Búgingi konferensıada osy jobalar usynylyp otyr», – deıdi IýNESKO-nyń Almatydaǵy Óńirlik keńsesiniń bilim berý baǵdarlamasy boıynsha ulttyq mamany Meıirgúl Alpysbaeva.
Konferensıa sońynda muǵalimder ózderiniń shaǵyn zertteý jumystaryn posterlik sesıa formatynda tanystyrdy. Bul zertteýler qazaq, orys jáne aǵylshyn tilderin úıretý, oqýshylardyń oqý daǵdylaryn damytý, pánge degen qyzyǵýshylyǵyn arttyrý sekildi taqyryptardy qamtydy.
«Aýyldyq mektep shamy» – aýyldyq bilim berý júıesin jaqsartýǵa baǵyttalǵan mańyzdy joba. Bul konferensıa aýyl muǵalimderiniń óz isine shynaıy berilgendigin, jańa ádisterdi meńgerýge daıyn ekendigin kórsetti.
