Bıyl Almatyda beınebaqylaý kameralarynyń kómegimen 272 qylmystyń beti ashylǵan. Al qurylǵylarǵa jaqynda ǵana engizilgen jańa fýnksıa kóligin turaqqa durys qoımaǵan 900 júrgizýshini anyqtapty. Qalanyń tynyshtyǵyn kúzetetin ári buzaqylardy ustaýǵa járdemdesetin beınekameralardyń sany búginde qanshaǵa jetken? Olar taǵy nendeı qyzmetke jarap jatyr? Osy jáne ózge de suraqtarǵa «Almaty» telearnasynyń stýdıa qonaǵy qalalyq Polısıa departamentiniń resmı ókili Saltanat Ázirbek jaýap berdi, dep habarlaıdy aqshamnews.kz
– Almatyda beınekameralardyń sany búginde qanshaǵa jetken?
"Almaty polısıasynyń qyzmetkerleri qoǵamdyq tártipti qamtamasyz etýde jáne qylmystylyqpen kúresýde 176 myń beınekameranyń kómegin paıdalanýda. Bul qoǵamdyq tártipti ǵana emes, sonymen qatar jol qaýipsizdigin qamtamasyz etýdi, is-tússiz joǵalǵan azamattardy, qylmyskerlerdi izdeýde septigi zor. Byltyr beınekameralardyń kómegimen 3,5 myńnan asa qylmystyń beti ashyldy. Sonymen qatar qalamyzdaǵy jol ahýalyn zerdeleý, baqylaý kezinde 3 mıllıonnan astam jol júrý erejesi anyqtaldy. Bul – óte jaqsy statısıka. Aıta keteıik, qalamyzdaǵy beınekameralarǵa jańa fýnksıa engizildi. Ásirese qoǵamdyq oryndarda ornalastyrylǵan beınekameralarda bet taný fýnksıasy bar. İzdeýde júrgen azamat beınekameralardyń tóńireginen ótse, mindetti túrde dabyl qaǵyp, polısıa qyzmetkerleri ustaýǵa baǵyttalǵan is-sharalardy qolǵa alady".
– Jańa fýnksıalar qandaı nátıje berip jatyr? Zań buzǵandarǵa qatysty derek byltyrǵymen salystyrǵanda qanshaǵa azaıdy?
"Árıne beınekameralardyń róli óte zor. Úlken megapolıste qoǵamdyq tártipti qamtamasyz etýde, tek adamı faktor emes, jańa tehnologıa – biz úshin kómek. Beınekamera bar jerde qylmys óte sırek bolady. Qoǵamdyq oryndarda ótken jylǵy eki aımen salystyrsaq, bıyl 27 paıyzǵa qylmys sany azaıdy. Bul –onyń tártiptik róliniń birden bir aıqyn belgisi".