Áleýmettik jelide kýágerlerdiń vıdeosy tarady
Memleket basshysy Qasym-Jomart Toqaev Almaty oblysynda pravoslav zıratyn qıratqan buzaqylardy qylmystyq jaýapqa tartýdy tapsyrdy, dep habarlaıdy Almaty-akshamy.kz Sputnik Qazaqstan saıtyna silteme jasap.
«İshki ister mınıstri E.Turǵymbaevqa Úshtóbe qalasyndaǵy (Almaty oblysy) pravoslav zıratyn qıratqan buzaqylardy zań júzinde qylmystyq jaýapkershilikke tartý týraly tapsyrma berildi», – dep jazdy Prezıdent Twitter-de.
Buǵan deıin Taldyqorǵan mańynda ornalasqan Úshtóbede belgisiz bireýler pravoslav zıratyn talqandaǵany habarlandy.
Áleýmettik jelide kýágerlerdiń vıdeosy tarady. Kadrda týystarynyń qabirine kelgen er adam men áıel ózderi kórgen jaıtty baıandaıdy. Aınala qabir ústindegi taqtaıshalar, synǵan temir men aǵash kirester, qorshaýlar shashylǵan.
Avtor vıdeo Qaratal aýdanynyń ákimshilik ortalyǵy sanalatyn Úshtóbe qalasy mańynda túsirilgenin aıtty. Qala turǵyndary jergilikti polısıaǵa aryzdandy.
Oblystyq polısıa departamenti aryzdyń tirkelgenin rastady. Vandalızm faktisi boıynsha qylmystyq óndiris qozǵaldy.
«Qylmystyq kodekstiń 294-baby «Vandalızm» boıynsha qarastyrylǵan isti tergeýmen Qaratal aýdandyq polısıasy aınalysyp jatyr. Osy qylmysqa qatysy bar adamdardy anyqtaý boıynsha jedel izdestirý sharalary júrgizilýde», – dep málimdedi Almaty oblysy polısıa departamentiniń baspasóz qyzmeti.