Air Astana áýe kompanıasy men «Qazaeronavıgasıa» respýblıkalyq memlekettik kásiporny arasynda ózara yntymaqtastyq týraly kelisimge qol qoıyldy. Qujat eki salanyń mamandary – ushqyshtar men áýe qozǵalysyn basqaratyn dıspetcherler arasyndaǵy kásibılikti arttyrýǵa baǵyttalǵan.
Kelisim aıasynda dıspecherler ushaq kabınasynda baqylaýshy retinde ushý múmkindigine ıe bolady jáne avıatrenajerlerde tájirıbeden ótedi.
Sonymen qatar, Air Astana ushqyshtary «Qazaeronavıgasıa» ortalyqtaryna baryp, áýe qozǵalysyn basqarý jumysymen tanysa alady. Bul is-sharalar eki tarap bir-biriniń qyzmetin tereńirek túsinýge, úılesimdilikti arttyrýǵa jáne avıasıalyq qaýipsizdik pen ushý tıimdiligin jetildirýge múmkindik beredi. Qujatqa «Qazaeronavıgasıa» RMK bas dırektorynyń birinshi orynbasary Faat Bogdashkın jáne Air Astana áýe kompanıasynyń óndiris jónindegi atqarýshy dırektory Fılıppos Sıakkas qol qoıdy. İs-shara barysynda taraptar BAQ ókilderiniń suraqtaryna jaýap berip, bolashaqtaǵy birlesken bastamalar men josparlaryn bólisti.
Sondaı-aq, spıker tájirıbe almasý baǵdarlamasynda ekıpaj jumysyn úırenýge arnalǵan dárister de baryn aıtty. Dıspecherler úshin óndiristik tájirıbe de qarastyrylǵan. Sol sıaqty, ushqyshtar da dıspecher jumysymen tanysady. Komandır men dıspecher ushý kezinde bir-birimen qalaı baılanys ornatady, qandaı máseleler týyndaıdy – osynyń barlyǵyn meńgeredi.
TAQYRYPQA ORAI
Faat BOGDASHKIN, «Qazaeronavıgasıa» RMK bas dırektorynyń birinshi orynbasary:
ÁÝE QAÝİPSİZDİGİ: JAÝAPKERSHİLİK JÚGİ ORTAQ
Búgingi qolǵa alynǵan bastama – Qazaqstan Respýblıkasynyń áýe keńistigindegi ushý qaýipsizdigin qamtamasyz etýge arnalǵan. Áýe qozǵalysyn basqaratyn dıspecher men áýe kemesin basqaratyn ekıpaj bir-biriniń jumysyn jetik bilýi qajet. Bul kelisimniń negizgi máni osynda. Osy maqsatta ekıpaj qatarynda bizdiń dıspecherimiz de bolmaq. Ol ushaqtaǵy komandır men ekinshi ushqyshtyń jumysymen tanysady, qandaı fýnksıalardy oryndaıtynyn, kabınadaǵy jumystardy kóredi. Óıtkeni, dıspetcher men ekıpaj arasyndaǵy baılanys únemi úzdiksiz júredi: áýe kemesi turaqta turǵan sátten bastap, qozǵalyp, ushyp, qaıta qonǵanǵa deıingi aralyqty qamtıdy.
Fılıppos SIAKKAS, Air Astana áýe kompanıasynyń óndiris jónindegi atqarýshy dırektory:
MAQSAT – ÓZARA ÁRİPTESTİKTİ NYǴAITÝ
Áýe qozǵalysynyń qaýipsizdigi dıspecher men ekıpajdyń ózara túsinisýi men birlese jumys isteýine tikeleı baılanysty. Dıspecherlerge áýe kemesiniń kabınasynda otyryp, ushqyshtarmen birge ushý jáne avıatrenajerde tájirıbeden ótý múmkindigi berildi. Olar ushqyshtardyń jumysymen tanysyp, áýe kemesin basqarýdy túsinedi. Ushqyshtar da dıspetcherlik ortalyqtarǵa baryp, áýe qozǵalysyn basqarý barysymen tanysa alady. Bul – eki taraptyń sheshim qabyldaý tásilin jáne bir-birine qalaı áser etetinin jaqsyraq túsinýge jol ashady. Maqsat – ushý qaýipsizdigin arttyrý jáne eki qurylym arasyndaǵy ózara áriptestikti nyǵaıtý.