Almaty qalasynda Uly Otan soǵysyndaǵy Jeńistiń 80 jyldyǵyna arnalǵan «Batyrlar sóıleıdi…» atty aýqymdy áleýmettik jobanyń fınaly ótti, dep habarlaıdy aqshamnews.kz
Qala mektepteriniń 9000-ǵa jýyq oqýshysy, pedagogteri men ata-analar qaýymdastyǵy atsalysqan bul bastama - jas urpaqtyń boıynda otansúıgishtik rýhty qalyptastyrýǵa baǵyttalǵan mańyzdy qadam boldy.
Jobany Almaty qalasy Bilim basqarmasyna qarasty Qalalyq bilim berýdegi jańa tehnologıalardyń ǵylymı-ádistemelik ortalyǵy uıymdastyrdy.
Mektepishilik, aýdandyq jáne qalalyq úsh kezeńnen turǵan «Batyrlar sóıleıdi…» jobasynyń qorytyndy kezeńine megapolıstegi 216 mektepten iriktelip shyqqan úzdik komandalar qatysty.
Fınalda oqýshylar soǵys jyldarynda erlik kórsetken qaharmandar - Mánshúk Mámetova, Álıa Moldaǵulova, Baýyrjan Momyshuly, Núrken Ábdirov, Hıýaz Dospanova, Talǵat Bıgeldınov jáne basqa da batyrlardyń beınesin sahnada kórkem túrde somdady. Teatrlandyrylǵan qoıylymdar, ádebı-mýzykalyq kompozısıalar men maıdan ánderi arqyly olar batyrlardyń rýhyn tiriltkendeı áser qaldyrdy. Zamanaýı jasandy ıntellekt tehnologıalarynyń kómegimen batyrlardyń daýysy men beınesi qaıta jańǵyryp, jas urpaqqa ún qatty.
Qalalyq ádistemelik ortalyq dırektory Daýren Saǵynǵalıevtiń aıtýynsha, bul joba - Almaty bilim júıesindegi eń aýqymdy ári mazmuny tereń sharalardyń biri.
– Uly Jeńistiń qaharmandary — ótkenniń ǵana emes, búgin men bolashaqtyń da rýhanı temirqazyǵy. Bul jobanyń negizgi maqsaty – tarıhymyzdaǵy erlik pen eldik úlgilerin búgingi jas býynnyń sanasyna sińirý, – dedi ol.
Joba aıasynda qala mektepterinde 2500-den astam patrıottyq baǵyttaǵy is-sharalar ótti. Al áleýmettik jelilerde 600-den astam beınerolık pen 3000-nan astam materıal jarıalanyp, qoǵamda keń qoldaý men tereń áser týdyrdy.