Almaty onkologıalyq ortalyǵyna jatyr moıny obyrynyń II satysy dıagnozymen 26 jastaǵy áıel tústi. Bul týraly ortalyqtyń onkogınekologıa bóliminiń meńgerýshisi Raıhan Bolatbekova málimdedi, dep habarlaıdy aqshamnews.kz
Naýqas bir jyl boıy qandy bólinister men ózge de shaǵymdarǵa qaramastan dárigerge barmaǵan.
– Onyń eki balasy bar. Tek jaǵdaıy tym aýyrlap ketken kezde ǵana medısınalyq kómekke júginýge sheshim qabyldaǵan, – deıdi Bolatbekova.
Dárigerler úsh saǵatqa sozylǵan kúrdeli ota jasady. Onyń barysynda jatyr, jatyr moıny jáne regıonarlyq lımfa túıinderi alyndy. Naýqastyń jasy jas bolǵandyqtan, analyq bezder saqtalyp qaldy. Bul oǵan bolashaqta sýrrogat ana kómegimen ana bolýǵa múmkindik beredi.
Ota sátti ótti. Qazirgi tańda áıel onkologıalyq ortalyqtyń baqylaýynda jáne hımıo-sáýlelik terapıa kýrsyn qabyldap jatyr.
Raıhan Bolatbekovanyń aıtýynsha, Almatyda jatyr moıny obyry áıelder arasyndaǵy onkologıalyq aýrýlar ishinde sút bezi obyrynan keıin ekinshi orynda tur. Tek 2024 jyly bul dıagnoz boıynsha 206 jańa jaǵdaı tirkelgen.
– Negizgi jas toby – 35 pen 50 jas aralyǵy. Biraq, ókinishke qaraı, aýrýdyń «jasarýy» úrdisi baıqalýda. Qazirdiń ózinde 20–24 jas aralyǵyndaǵy qyz-kelinshekter arasynda jatyr moıny obyrynyń anyqtalǵan jaǵdaılary bar, – deıdi onkogınekolog.
Aýrýdyń bastapqy kezeńi aıqyn belgilersiz ótetindikten, ony erte anyqtaý úshin turaqty profılaktıkalyq tekserýler men skrınıngten ótip turý óte mańyzdy.
Memlekettik baǵdarlama aıasynda 30 ben 70 jas aralyǵyndaǵy áıelder tórt jylda bir ret tegin skrınıngten óte alady. Bul – sıtologıalyq jaǵyndy alý arqyly júrgiziletin, aýrýdy erte kezeńde anyqtaýǵa múmkindik beretin qarapaıym jáne tıimdi ádis.
Dárigerler barlyq áıelderge tipti bolmashy belgilerdiń ózin elemeýge bolmaıtynyn eskertip, gınekologqa júıeli túrde qaralyp turýǵa keńes beredi. 26 jastaǵy naýqas jaǵdaıynda der kezinde tekserilmeý onyń reprodýktıvti fýnksıasynan aıyrylýyna sebep boldy.