Eki márte Keńes Odaǵynyń Batyry Talǵat Bıgeldınov atyndaǵy Áýe qorǵanys kúshteriniń áskerı ınstıtýtynda osy jyldyń 21 shildesinen 8 tamyzyna deıin jergilikti áskerı basqarý organdaryna ótinish bergen talapkerler irikteýden ótedi, dep habarlaıdy Almaty-akshamy.kz.
Oqý orny «memlekettik avıasıadaǵy áýe kemelerin ushýǵa paıdalaný», «avıasıalyq tehnıka jáne tehnologıalar», «ushqyshsyz basqarylatyn qurylǵylardy paıdalaný», «áskerı medısına», «áskerı istegi teńiz tehnıkasy jáne tehnologıalary» mamandyqtary boıynsha daıarlaıdy.
– Joǵary oqý orny tájirıbeli profesorlyq-oqytýshylyq kadrlarmen jasaqtalǵan. Bul bilim ordasynda kýrsanttardy ushý jáne ınjenerlik-tehnıkalyq mamandyqtarǵa oqytý úshin qajetti materıaldyq-tehnıkalyq baza bar, – dep atap ótti Áýe qorǵanysy kúshteri áskerı ınstıtýtynyń bastyǵy polkovnık Talǵat Syzdyqov.
Oqý ornyna irikteý barysynda talapkerler áskerı-dárigerlik saraptama júrgizý qaǵıdalaryna sáıkes kásibı-psıhologıalyq irikteýden, medısınalyq kýálandyrýdan ótedi, dene daıarlyǵy jónindegi normatıvterdi tapsyrady.
Bıylǵy jyly ınstıtýt qazaqstandyqtar úshin 215 oryn, Reseı, Armenıa jáne qytaı áskerı oqý oryndaryna túsetin talapkerler úshin 28 oryn bólip otyr. Budan basqa, UQSHU-ǵa múshe memleketter úshin áskerı kadrlar daıarlaý týraly kelisimge sáıkes oqý orny Tájikstan Qarýly kúshteriniń ókilderine 6 oryn beredi.
Kýrsanttardy «áskerı istegi teńiz tehnıkasy jáne tehnologıalar» mamandyǵy boıynsha bilim alýdyń erekshelikteri bar. Alǵashqy eki kýrsta jalpy bilim beretin jáne jalpy áskerı pánderdi oqytý Áýe qorǵanysy kúshteriniń áskerı ınstıtýtynda júredi. Al úshinshi – besinshi kýrstardaǵy teńiz tehnıkasyna qatysty beıindi pánder Aqtaý q. Shahmardan Esenov atyndaǵy Kaspıı tehnologıa jáne ınjınırıń ýnıversıtetinde oqytylady.
Qazaqstanda áskerı mamandardy daıarlaý Almatydaǵy eki joǵary oqý ornynda – armıa generaly Saǵadat Nurmaǵambetov atyndaǵy Qurlyq áskerleriniń áskerı ınstıtýtynda jáne Radıoelektronıka jáne baılanys áskerı-ınjenerlik ınstıtýtynda, sondaı-aq Aqtóbedegi eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýtynda júzege asyrylatynyn aıta ketken jón.
Bul oqý oryndarynda taktıkalyq býyn komandırleri daıyndalady. Bilim alyp shyqqan túlekterge «leıtenant» áskerı ataǵy beriledi.