Astanada burynǵy áıeli men úsh balasyn turyp jatqan úıinen májbúrlep shyǵaryp jibergen er adam qamaldy.
Astanalyq Dana Ateshova burynǵy kúıeýi Marat Áıtenovtiń polıseılermen jáne jeke sot oryndaýshylarmen birge úıine kelip, balalardy bir-birlep úıden májbúrlep shyǵarǵanyn, ózin soqqyǵa jyqqanyn áleýmettik jelide jarıalaǵan, dep habarlaıdy Almaty-akshamy.kz
Osyǵan oraı Astana polısıasy tergeý bastalǵanyn málimdedi.
Marat Áıtenov — Shymkenttiń burynǵy ákimi Murat Áıtenovtiń týǵan baýyry.
«Jeke sot oryndaýshylary úıden shyǵarý týraly sot sheshimin oryndap jatqanda burynǵy erli-zaıyptynyń arasynda janjal týdy. Kúsh qoldaný deregi boıynsha Áıtenovke qatysty tergeý bastaldy. Tıisti saraptama taǵaıyndaldy. Sonyń nátıjesine qaraı prosesýaldy sheshim qabyldanady», - dedi vedomstvodaǵylar.
Búgin advokat Damır Ishmametov áleýmettik jelidegi paraqshasynda Marat Áıtenovtiń qamaýǵa alynǵanyn jetkizdi.
Onyń aıtýynsha, Ákimshilik kodekstiń 73-baby boıynsha tergeý soty bolady.
«Qylmystyq kodekstiń 108-baby, 1-bólimi boıynsha is qozǵaldy. Munymen toqtap qalmaımyz, kúdiktiniń áreketinde ózge de qylmystyń belgileri bar, polısıadan jaza qoldanýyn talap etemiz. Sondaı-aq er adam áıeldi uryp jatqanda aralaspaı qur qarap turǵan polısıa qyzmetkerlerine qatysty qyzmettik tergeý júrip jatyr. Bireýi tipti sot oryndaýshylaryna kómektesip, balany jylaǵan kúıi kóterip syrtqa shyǵaryp tastady», - deıdi qorǵaýshy.
Qazaqstannyń bala quqyqtary jónindegi ýákili Dınara Zákıeva bala quqyǵynyń buzylýyna baılanysty Bas prokýratýradan shara qoldanýyn ótinip usynym joldaǵan.