Bilim berý ınfraqurylymyn qoldaý qory arqyly 61 mekteptiń qurylysy qarjylandyryldy.
Qazaqstanda eki jylda úsh aýysymdy mektep sany 3 esege azaıdy, dep habarlaıdy aqshamnews.kz oqý-aǵartý mınıstrligine silteme jasap.
Elimizde 2019 jyldan bastap 1 mln-nan astam oqýshy ornyna arnalǵan 1200 jańa mektep qoldanysqa berildi. Ásirese, 2023, 2024 jyldary qurylys erekshe qarqyndy boldy. Bul kezeńde 510 myń orynǵa arnalǵan 422 mektep salynǵan.
Bul qurylys jumystary elimizde 100-ge jýyq úsh aýysymdy mektepti ǵana emes, 200-den astam mektepte oryn tapshylyǵyn joıýǵa múmkindik berdi.
"Jaıly mektep" ulttyq jobasy aıasynda jańa formattaǵy mektepter salýǵa basymdyq berilýde. 2024 jyldyń qorytyndysy boıynsha 105 jaıly mektep berildi, 2025 jyldyń sońyna deıin taǵy 112 mekteptiń qurylysyn aıaqtaý josparlanýda", - dep jazylǵan habarlamada.
Sonymen qatar Bilim berý ınfraqurylymyn qoldaý qory arqyly 61 mekteptiń qurylysy qarjylandyryldy, onyń aıasynda taǵy 28 bilim ordasyn salý josparlanýda.
Bilim berý uıymdarynyń ınfraqurylymyn jaqsartý aıasynda jyl saıyn 1000 aýyldyq mektepti jańǵyrtý, sondaı-aq qoldanystaǵy mektepterdi kúrdeli jóndeý, zamanaýı pándik kabınettermen jabdyqtaý júrgizilýde. Mektepterdiń ınfraqurylymyn biryńǵaı zamanaýı formatqa kóshirý boıynsha aldaǵy úsh jyl ishinde elimizdiń barlyq óńirinde 1300-ge jýyq mektepti renovasıalaý josparlanýda.