Bıyl 15,1 mln sharshy metr turǵyn úı salý josparlanǵan.
QR Indýstrıa jáne ınfraqurylymdyq damý mınıstri Qaıyrbek Óskenbaev Úkimet otyrysynda ónerkásip, kólik jáne qurylys salalaryndaǵy aǵymdaǵy jaǵdaı týraly habardar etti, dep habarlaıdy Almaty-akshamy.kz atalǵan mınıstrliktiń baspasóz qyzmetine silteme jasap.
2022 jyldyń qańtar-naýryz aılarynda qurylys boıynsha naqty kólem ındeksi 108,6% qurady.
«Turǵyn úı qurylysynda bıyl 1 toqsanda 2,8 mln sharshy metr baspana paıdalanýǵa berildi. Bul 2021 jyldyń sáıkes kezeńimen salystyrǵanda 100,4% quraıdy. Búgingi tańda respýblıka boıynsha barlyǵy 23,3 myń úı paıdalanýǵa berildi. 15 óńirde ósim bar. Kósh basynda Pavlodar, Almaty, Shyǵys Qazaqstan, Batys Qazaqstan jáne Túrkistan oblystary tur. Bıyl 15,1 mln sharshy metr turǵyn úı salý josparlanǵan», - dedi QR IIDM basshysy Úkimet otyrysynda.
2022 jyldyń 1 toqsanynyń qorytyndysynda elimizdiń óńdeý ónerkásibinde jıyntyq kórsetkish 106,5% qurady.
Mashına jasaý salasynda avtokólik quraldaryn, treılerler men jartylaı tirkemelerdi (+14,8%), mashınalar men jabdyqtardy (+3,4%) shyǵarý, ózge kólik quraldaryn (+13,3%), kompúterler, elektrondyq jáne optıkalyq jabdyqtar (+18,3%), sondaı-aq elektr jabdyqtaryn (+1,8%) shyǵarý esebinen 11,3% deńgeıinde turaqty ósim kórsetti.
Tústi metalýrgıada tazartylǵan mys (+10%), quıma altyn (+7%), katodty mys (+4%), tazartylǵan altyn (+33%) shyǵarý kólemi ósti. Qara metalýrgıada bolat (+7%), shoıyn (+6%), armatýralyq prokat (+24%), relster (+32%), fasondy prokat (+55%), ferrosılısıı (+2,7%) jáne bolat qubyrlar (2,6 ese) óndirisi ulǵaıdy.
Qurylys materıaldary óndirisi 12,4% artty. Ósim jylý oqshaýlaǵysh materıaldar (1,5 ese), betonnan jasalǵan buıymdar (+15,4%), taýar beton (+22,8%), kirpish (+17,8%) jáne qurylys eritindileri (+10,7%) óndirisiniń artýy esebinen boldy.
Hımıa ónerkásibi óndirisiniń kólemi 7,8% ósti. Sary fosfor (+49%), fosfor-kalıı tyńaıtqyshtary (+43%), azyqtyq trıkalsııfosfat (+73%), amıak selıtrasy (+10), suıyq amıak (+13%), azot qyshqyly (+8), eritindidegi kúıdirgish natrıı (+28%) jáne hlor (+41) óndirisiniń kólemi ulǵaıdy.
Jeńil ónerkásipte toqyma buıymdaryn (+6,6%), kıim (+13%) jáne bylǵary ónimderin (+28,8%) óndirý kóleminiń ulǵaıýy esebinen 10,6% ósti.
Kólik salasynda tranzıttik konteınerlik tasymaldarda oń dınamıka saqtalyp, ósim 7% qurady. Kóliktiń barlyq túrimen júk tasymaldaý kólemi 849,2 mln tonna boldy.